හුංගම, වාඩිගල ප්‍රදේශයේ නිවසක් තුළදී යුවළක් ඝාතනය කිරීමේ සිද්ධියට අදාළ නිවෙස් හිමි කාන්තාවද පොලීසිය විසින් අත්අඩංගුවට ගෙන ඇති බව වාර්තා වේ.
ඒ එම ඝාතනයට ආධාර අනුබලදීමේ චෝදනා මතයි.
පොලීසිය පැවසුවේ, දුරකථන විශ්ලේෂණ සහ විමර්ශනවලින් පසුව එම කාන්තාව හා ඝාතනය සිදුකළ ප්‍රධාන සැකකරු වන කඩවත ආරච්චිගේ සමන් කුමාර නොහොත් ‘අඳුපැලෑනේ බිංදු’ නැමැත්තා අතර ද සමීප සබඳතාවක් පැවතීම හේතුවෙන් ඊට ඇය ආධාර අනුබල දී ඇතැයි සැකකරන බවයි.
මෙම කාන්තාවගේ ස්වාමිපුරුෂයා ද මත්ද්‍රව්‍ය ජාවාරමට රක්ෂිත බන්ධනාගාර ගත කර සිටින අයෙක් බව තොරතුරු අනාවරණය වි තිබේ.
මේ අතර ප්‍රධාන සැකකරු පොලීසිය හමුවේ තවත් තොරතුරු රැසක් හෙළිකර ඇත.
සැකකරු පවසා ඇත්තේ, තමන්ට සිය මිතුරා සමීප සබඳතාවක් පැවැත්වූ කාන්තාව ඝාතනය කිරීමට කිසිදු අවශ්‍යතාවක් නොවූ බවයි.
තමා සිය මිතුරාට වෙඩිතැබූ බවත් එහිදී ඔහු, එම කාන්තාව පසුපස සැඟවීම නිසා ඇයට වෙඩි වැදුණු බවත් සැකකරු පවසා ඇත.
සිය මිතුරා ඝාතනය කළේ, තම මත්ද්‍රව්‍ය ජාවාරම පිළිබඳ තොරතුරු පිළිබඳව ඔහු දැනුම්වත්ව සිටීම නිසා බවද සැකකරු පැවසූ බව වාර්තා වේ.
මේ අතර අත්අඩංගුවේ පසුවන සැකකරුවන් පිරිස අඟුණුකොළපැලැස්ස මහෙස්ත්‍රාත් අධිකරණයට අද (08) ඉදිරිපත් කෙරුණි.
ඝාතනයට සම්බන්ධ තවත් සැකකරුවන් දෙදෙනෙකු අත්අඩංගුවට ගැනීමට පොලිස් විමර්ශන ක්‍රියාත්මක වන අතර සිද්ධිය සම්බන්ධ විමර්ශන තංගල්ල අපරාධ කොට්ඨාසය භාර සහකාර පොලිස් අධිකාරී අරුණ ලාල්ගේ අධීක්ෂණයෙන් ක්‍රියාත්මකයි.
