ගණේමුල්ල සංජීව ඝාතනයේ ප්‍රධාන සැකකාරිය වන ඉෂාරා සෙව්වන්දි ඇතුළු සිව්දෙනෙකු නේපාලයේදී අත්අඩංගුවට ගැනීමෙන් අනතුරුව දිවයිනට රැගෙන ඒම සම්බන්ධයෙන් රැඳවුම් නියෝග ලබා ගන්නා බව කොළඹ අපරාධ කොට්ඨාශය පවසයි.
ඉෂාරා සෙව්වන්දි සමඟ, ජේ.කේ බායි, සුරේෂ්, සහ තක්ෂි යන සැකකරුවන් සම්බන්ධයෙන් මෙලෙස රැඳවුම් නියෝග ලබා ගැනීමට නියමිතයි.
පොලිසිය පවසන්නේ ප්‍රබල සංවිධානාත්මක අපරාධ කල්ලි නායකයෙකු වූ ගණේමුල්ල සංජීවගේ ඝාතන සිද්ධිය ඇතුළු අපරාධ සම්බන්ධයෙන් ඉෂාරා සෙව්වන්දි ඇතුළු මෙම සැකකරුවන් කණ්ඩායමගෙන් ප්‍රශ්න කිරීමට කටයුතු කරන බවයි.
නේපාල ආරක්ෂක අංශ සමඟ එක්ව ක්‍රියාත්මක කළ විශේෂ මෙහෙයුමකින් ඉෂාරා සෙව්වන්දි ඇතුළු අපරාධකරුවන් හය දෙනෙකු නේපාලයේදී අත්අඩංගුවට ගත් අතර අත්අඩංගුවට ගත් පිරිස අතරට ගම්පහ බබා සහ ජම්බුගස්මුල්ලේ බබි යන අපරාධකරුවන් ද ඇතුළත් වෙයි.
අත්අඩංගුවට ගත් සැකකරුවන් අතරින්, ගම්පහ බබා පෑලියාගොඩ දිසා අපරාධ කොට්ඨාශයටත්, ජම්බුගස්මුල්ලේ බබි බස්නාහිර පළාත් දකුණ අපරාධ කොට්ඨාශයටත් වැඩිදුර විමර්ශන සඳහා භාර දී ඇති බව පොලිසිය තවන් දුරටත් පවසයි.
