දිනක් පාසල් නොපැමිණීමට කෝප වී පාසල් සිසුවියකට ලී පතුරකින් පහර දුන් ආණමඩුව අධ්‍යාපන කලාපයේ ප්‍රාථමික පාසලක විදුහල්පතිවරයෙක් සම්බන්ධයෙන් ආණමඩුව පොලීසිය විමර්ශනයක් අරඹා ඇත.
ඒ අනුව පොලීසිය විසින් අදාළ පහරදීමට සම්බන්ධ විදුහල්පතිවරයා සම්බන්ධයෙන් අධිකරණයට කරුණු වාර්තා කර ඇති අතර මෙලෙස පහර කෑමට ලක්ව ඇත්තේ කෑදැත්තෑව ප්‍රදේශයේ පදිංචි 7 හැවිරිදි දැරියකි.
අදාළ සිදුවීමට මුහුණ දී ඇති දැරිය පෙර දින පාසලට නොපැමිණීම ගැන කෝප වී, අසල තිබූ ලී පතුරක් රැගෙන විදුහල්පතිවරයා විසින් පහර කිහිපයක් ගසා ඇති බව ඇගේ මව්පියන් විසින් ආණමඩුව පොලීසියට පැමිණිලි කර ඇත.
ඒ අනුව ඉදිරි විමර්ශන කටයුතු ආණමඩුව පොලිස්ථානාධිපති ප්‍රධාන පොලිස් පරික්ෂක සංජීව ප්‍රේමතිලකගේ උපදෙස් මත, අපරාධ විමර්ශන අංශ ස්ථානාධිපති පොලිස් පරීක්ෂක ආර්.ඒ. වන්නිආරච්චි ඇතුළු කණ්ඩායමක් පවත්වයි.
