සමගි ජන බලවේගයේ ගම්පහ දිස්ත්‍රික්කයේ ප්‍රධාන ආසන කිහිපයක සංවිධායක ධුර මාරු කිරීමේ සැලසුම් කර ඇති බව වාර්තා වේ.
මහර සමගි ජන බලවේගයේ ප්‍රධාන සංවිධායක ලෙස කටයුතු කළ හසිත් ගුණසේකරට කටාන ආසන සංවිධායක ධුරය ලබා දීමට පක්ෂය සූදානම් වන බව වාර්තා වන්නේ.
හසිත් ගුණසේකර මහර ආසනයෙන් ඉවත්වීමෙන් හිස්වන මහර ආසන සංවිධායක ධුරය, දැනට ගම්පහ ආසන සංවිධායක ලෙස කටයුතු කරන වරුණ දීප්ත රාජපක්ෂ වෙත පැවරීමට නියමිතව ඇත.
එමෙන්ම, වරුණ දීප්ත රාජපක්ෂගේ ඉවත්වීමෙන් හිස් වන ගම්පහ ආසන සංවිධායක ධුරය සමගි වනිතා බලවේගයේ නියෝජ්‍ය ජාතික සංවිධායිකා ප්‍රසාදිනී කාරියවසම් සම්මන්දප්පෙරුම වෙත ලබා දීමට සැලසුම් කර ඇති බව වාර්තා වේ.
කෙසේ වෙතත්, මේ වන විට කටාන ආසන සංවිධායක ලෙස කටයුතු කරන නීතිඥ රෝස් ප්‍රනාන්දුගේ ඉරණම පිළිබඳව මෙතෙක් කිසිදු අවසන් තීරණයක් ගෙන නොමැති බවද සමගි ජන බලවේග ආරංචි මාර්ග පෙන්වා දෙයි.
