2025 වසරේ ජනවාරි මස සිට ඊයේ (20) දිනය දක්වා දිවයින පුරා ඩෙංගු රෝගීන් 40,633ක් වාර්තා වී ඇති බව ජාතික ඩෙංගු මර්දන ඒකකයේ, ප්‍රජාව වෛද්‍ය විශේෂඥ ප්‍රෂීලා සමරවීර පවසයි.
අද (21) මාධ්‍ය වෙත අදහස් දක්වමින් වෛද්‍යවරිය පවසන්නේ වැඩි වශයෙන් රෝගීන් වාර්තා වන්නේ බස්නාහිර පළාතෙන් බවයි.
එමෙන්ම වැඩි අවදානමක් ඇති දිස්ත්‍රික්ක 11ක් හඳුනාගෙන ඇති අතර කොළඹ, ගම්පහ, කළුතර, මහනුවර, ගාල්ල, මාතර, යාපනය, මඩකලපුව, කුරුණෑගල, රත්නපුර සහ කෑගල්ල එම දිස්ත්‍රික්ක බවත් එම කාලය තුළ මරණ 22ක් වාර්තා වී ඇති අතර වැඩිම මරණ වාර්තා වී ඇත්තේ රත්නපුර දිස්ත්‍රක්කයෙන් බවත් ඇය වැඩි දුරටත් පවසයි.
ඇය පවසන පරිදි වැඩි වශයෙන් මදුරුවන් බෝවන ස්ථාන ලෙස හඳුනාගෙන ඇත්තේ පාසැල් පද්ධති, රජයේ ආයතන, ආගමික ස්ථාන සහ අතහැර දමා ඇති ඉඩම් සහ ගොඩනැගිලි බැවින් මදුරුවන් බෝවන ස්ථාන විනාශ කිරීමට සහ වටපිටාව පිරිසිදුව තබා ගැනීමට කටයුතු කරන ලෙස වෛද්‍යවරිය ඉල්ලා සිටී.
එමෙන්ම දින දෙකකට අධික කාලයක් උණ පවතීනම් සුදුසුකම් ලත් වෛද්‍යවරයෙකු උපදෙස් පරිදි අවශ්‍ය ප්‍රතිකාර ලබා ගන්නා ලෙසද ඇය වැඩිදුරටත් මහජනතාවට අවධාරණය කරයි.
