ලංකා ට්‍රාන්ස්ෆෝම්ර්ස් (Lanka Transformers Limited) ආයතනය රජයේ විගණනය වලක්වා ගැනීම සඳහා ලංකා විදුලි බල මණ්ඩලය සතුව තිබූ 70% කොටස් 35% දක්වා අඩු කිරීමට කරන ලද සැලසුමක් පාර්ලිමේන්තුවේ පොදු ව්‍යාපාර පිළිබඳ කාරක සභාවේදී (කෝප් කමිටුව)අනාවරණය වී ඇත.
කෝප් කමිටුවේ සභාපති වෛද්‍ය නිශාන්ත සමරවීරගේ ප්‍රධානත්වයෙන් ඊයේ(24) දින පාර්ලිමේන්තුවේදී කෝප් කමිටුව රැස්වූ අවස්ථාවේදී මේ පිළිබඳ තොරතුරු අනාවරණය වී ඇත.
LTL ආයතනය රාජ්‍ය ව්‍යාපාරයක් ලෙස ආරම්භ කෙරුණද ඵය රජයේ විගණනයට ලක් වී නොමැති අතර ඊට හේතුව වශයෙන් LTL ආයතනයේ නිලධාරීන් කෝප් කමිටුවට ප්‍රකාශ කොට ඇත්තේ එම ආයතනයේ කොටස්වලින් බහුතරයක් ඇත්තේ පෞද්ගලික අංශයට බවයි.
LTL ආයතනයට රජයේ විගණනයක් අවශ්‍ය නොවන බවත් LTL ආයතනය මගින්ම විගණනයක් සිදු කරන බවත් පෙන්වාදීමට LTL ආයතනයේ ඇතැම් නිලධාරීන් කෝප් කොමිටුවේදි දැඩි උත්සාහයක් ගත් බව වාර්තා වේ.
ලංකා විදුලි බල මණ්ඩලය සතුව තිබූ LTL ආයතනයේ 70% කොටස් 35% දක්වා අඩුවී ඇති බවද LTL ආයතනයේ නිලධාරීන් කෝප් කමිටුවට ප්‍රකාශ කොට තිබේ.
නමුත් LTL ආයතනය පෞද්ගලික අංශය වෙත ලබා දී තිබූ සමහර කොටස් ලබාගත් සමාගම්වල කොටස් යළි මහා භාණ්ඩාගාරය සතුවීම නිසා LTL ආයතනයේ 52%ක කොටස් ප්‍රමාණයක් තවමත් රජය සතු බව කෝප් කමිටුව මෙහිදී පෙන්වා දී තිබේ.
මේ අනුව කෝප් කමිටුව බලශක්ති අමාත්‍යාංශයේ ලේකම්වරයාට නිර්දේශ කොට ඇත්තේ LTL ආයතනය රජයේ විගණකාධිපතිවරයාගේ සෘජු විගණනයට ලක්විය යුතු ආයතනයක් බවයි.
මේ සම්බන්ධයෙන් බලශක්ති අමාත්‍යාංශයේ ලේකම්වරයාටද ඒ අවස්ථාවේදී කෝප් කමිටුව දැනුම් දී ඇත්තේ LTL ආයතනය මින් පසු රජයේ විගණකාධිපතිවරයාගේ විගණනයට යටත් විය යුතු බවයි.
ඒ අනුව ඉදිරියේදී එම විගණන කටයුතු සිදුකර වාර්තාවක් ලබාදෙන ලෙසද කෝප් කමිටුව බලශක්ති අමාත්‍යංශයේ ලේකම්වරයාටත් රජයේ විගණකාධිපති දෙපාර්තමේන්තුවටත් දැනුම් දී තිබේ.
LTL ආයතනය ලංකා විදුලිබල මණ්ඩලයේ උප පරිපාලිත ආයතනයකි.
