ඉන්දීය ක්‍රිකට් ක්‍රීඩක ශ්‍රෙයස් අයියර් පපුවේ ඉල ඇට කූඩුව ආශ්‍රිතව සිදුව තිබෙන අභ්‍යන්තර රුධිර වහනයක් හේතුවෙන් මේ වන විට දැඩි සත්කාර ඒකකයට ඇතුළත් කර ඇති බව ඉන්දීය මාධ්‍ය වාර්තා කරයි
ඕස්ට්‍රේලියාව සමග පැවති තෙවන එක්දින තරගයේ ඇලෙක්ස් කේරිගේ කඩුල්ල දවා ගැනීම වෙනුවෙන් අයියර් විශිෂ්ට උඩපන්දුවක් රැකගත් අතර එහිදී ඔහු මෙලෙස ආබාධයට ලක් විය.
ඒ අනුව ඔහුව රෝහල්ගත කිරීමෙන් පසු අභ්‍යන්තර රුධිර වහනයක් හඳුනාගෙන තිබේ
ඔහුගේ පපුවේ වම්පස ඉල ඇට කූඩුව ආශ්‍රිතව මෙලෙස රුධිර වහනය සිදු වන බව සඳහන් වන අතර එය ජීවිත අවධානමක් පවා ඇති දරුණු අවස්ථාවක් ලෙසින් ඉන්දීය මාධ්‍ය වාර්තා කරයි.
කෙසේ නමුත් අයියර්ව ඉක්මනින් රෝහල්ගත කිරීමට කටයුතු කිරීම හේතුවෙන් ඔහු මේ වන විට ස්ථාවර තත්ත්වයක සිටින බව වාර්තා වේ.
මෙම ආබාධය මරණීය අවස්ථාවක් දක්වා ගමන් කිරීමේ අවධානමක් තිබූ බවත් ඉන්දීය ක්‍රිකට් කණ්ඩායමේ වෛද්‍යවරුන්ගේ ක්ෂණික තීරණය නිසා හානිය අවම කර ගැනීමට අවස්ථාව ලැබුණ බවත් OutlookIndia වෙබ් අඩවිය වාර්තා කරයි.
ශ්‍රෙයාස් අයියර්ට අවම වශයෙන් තව සතියකට අධික කාලයක් රෝහල්ගත වී සිටීමට සිදුවනු ඇති බවද සඳහන් වේ.
