මත්ද්‍රව්‍ය ව්‍යාපාරයට සහ සංවිධානාත්මක අපරාධ වලට සම්බන්ධ පුද්ගලයින් දේශපාලනයට සම්බන්ධ වී සිටින බවත් ඉදිරියේදී ජාතික දේශපාලනයට පැමිණීමටත් සැලසුම් සකස් කර ඇති බවත් පොලිස්පති ප්‍රියන්ත වීරසූරිය පවසයි.
මෙවැනි පුද්ගලයන් හට සාමාජිකත්වය ලබා දෙන්නේද සහ ඉදිරි මැතිවරණ වලදී අපේක්ෂකත්වය දෙන්නේද යන්න පක්ෂ විසින් තීරණය කළ යුතු බව ඔහු සඳහන් කරයි.
එසේම මේ කාරණය සම්බන්ධයෙන් විවෘතව සාකච්ඡා කල යුතු අතර මත්ද්‍රව්‍ය ව්‍යාපාරයට සම්බන්ධ පුද්ගලයන් සහ සංවිධානාත්මක අපරාධකරුවන් පක්ෂ දේශපාලනයට පැමිණ තම ජාවාරම් සඳහා ආවරණයක් ලබා ගැනීමට උත්සාහ ගැනීම පිළිබඳව ද පක්ෂ අවධානය යොමු කළ යුතු බව ඔහු කියා සිටියි.
මෙම අපරාධකරුවන් විසින් සෑම පක්ෂයකටම ඇතුලත් වීමට උත්සාහ දරන බවත් දැනට පක්ෂ වලට සම්බන්ධ අපරාධකරුවන්ගේ ලැයිස්තුව මහජන ආරක්ෂක අමාත්‍යවරයා විසින් පාර්ලිමේන්තුවේදී ඉදිරිපත් කරනු ඇති බව ද ය පොලිස්පති ප්‍රියන්ත වීරසූරිය පවසා සිටියි.
පාර්ලිමේන්තු මන්ත්‍රී ජගත් විතානටත් තාවකාලිකව ආරක්ෂාව ලබා දී ඇති බවත් සංවිධානාත්මක අපරාධ වලට සම්බන්ධ පුද්ගලයන්ගේ සහසම්බන්ධකම් නිසා ඔහුගේ ජීවිතයට තර්ජන එල්ල වී ඇති බවත් පොලිස්පතිවරයා සඳහන් කරයි.
මෙලෙස තර්ජන නිර්මාණය වීමට හේතුව සම්බන්ධයෙන්ද විවෘතව විමර්ශනයක් පවත්වන බව පොලිස්පති ප්‍රියන්ත වීරසූරිය වැඩි දුරටත් පවසා සිටියි.
