පොලිස්පති ප්‍රියන්ත වීරසූරිය සමගි ජන බලවේගයේ පාර්ලිමේන්තු මන්ත්‍රී ජගත් විතාන පිළිබඳව සිදු කළ ප්‍රකාශය සම්බන්ධයෙන් ඔහු විසින් නීතිමය පියවර ගැනීමට නියමිත බව සඳහන් කර තිබියදී ඒ සම්බන්ධව වැඩිදුර තොරතුරු ප්‍රකාශ කිරීම සුදුසු නොවන බව පොලිස් මාධ්‍ය ප්‍රකාශක සහකාර පොලිස් අධිකාරී එෆ්.යු. වුට්ලර් පවස‍යි.
ඔහු මෙම අදහස් පල කළේ, අද (28) පැවති කැබිනට් තීරණ දැනුම්දීමේ අවස්ථාවට සහභාගී වෙමිනි.
එහිදී ඔහු වැඩිදුරටත් කියා සිටියේ,
“පාර්ලිමේන්තු මන්ත්‍රීවරයා වෙත මේ වන විට පොලිස් ආරක්ෂාව ලබාදීලා තියෙනවා. පාර්ලිමේන්තු මන්ත්‍රීවරයා කියලා තියෙනවා මේ වන විට නීතිමය කටයුතු අරගන්නවා කියලා. නීතිමය කටයුත්තක් තියෙද්දි ඒකට අපි වැඩිදුර කතා කිරීමට සුදුසු නොවේ…”
එහෙත් මේ සම්බන්ධයෙන් මාධ්‍යවේදීන් දිගින් දිගටම ප්‍රශ්න කළ අතර, එහිදී ඔවුන් පෙන්වා දුන්නේ, මේ වන විට නීතිමය කටයුත්තක් සිදු වෙනවායැයි ප්‍රකාශ කරමින් පොලිස්පතිවරයා සිදුකළ ප්‍රකාශය මගහැර යෑමට පොලිස් මාධ්‍ය ප්‍රකාශකවරයා උත්සහ දැරීමට කටයුතු කරන බවයි.
පොලිස්පතිවරයා යනු වගකිව යුතු නිලධාරියෙක් බවත්, පොලිස්පතිවරයා සතුව මෙම ප්‍රකාශය තහවුරු කිරීමට තරම් සාක්ෂි ප්‍රමාණවත්ව තිබේද යන්නත් ඔවුන් එහිදී ප්‍රශ්න කලේය.
එයට පිළිතුරු ලබා දෙමින් පොලිස් මාධ්‍ය ප්‍රකාශක එෆ්.යු. වුට්ලර් කියා සිටියේ,
“ඒක තමයි මම පැහැදිලිවම කිව්වේ, විශේෂයෙන්ම මෙම ප්‍රකාශය සම්බන්ධයෙන් තොරතුරු ලබා ගැනීම සඳහා තවදුරටත් තර්ජන තක්සේරුවක් අපි කරනවා. ඒ තර්ජන තක්සේරුව රාජ්‍ය බුද්ධි සේවය, විශේෂ බුද්ධි අංශ සහ ප්‍රාදේශිය පොලිස් යන යන සියලු අංශවලින් අපි ගෙන්වා ගැනීමට..”
ඒ අනුව පොලිස්පතිවරයා මෙම ප්‍රකාශය සිදු කළේ මෙම තර්ජන තක්සේරුව නොමැතිවදැයි මාධ්‍යවේදීන් තවදුරටත් ප්‍රශ්න කර සිටියේය.
කෙසේවෙතත්, එයට පිළිතුරු ලබාදීමට පොලිස් මාධ්‍ය ප්‍රකාශකවරයා අපොහොසත් වූ අතර, එම අවස්ථාවට සහභාගී වී සිටි විදේශ අමාත්‍ය විජිත හේරත් සඳහන් කර සිටියේ,
“පොලිස්පතිතුමා මේ ප්‍රකාශය කළේ මොන තොරතුරු මතද කියන එක පොලිස්පතිතුමා තමයි දන්නේ. ඉතින් අපි දන්නේ නෑ පොලිස්පතිතුමාට එවැනි තොරතුරු දත්ත ලැබිලා තියෙනවද කියලා. ඒ දත්ත මත එතුමා එහෙම ප්‍රකාශයක් කලා වෙන්න පුලුවන්. අපි බලමු පොලිස්පතිතුමාගෙන් ඒ ගැන අහලා…”
