ඕස්ට්‍රේලියාවේ මෙල්බර්න් නුවර ධම්ම සරණ විහාරයේ විහාරාධිපති නාඔටුන්නේ විජිත නායක හිමිපාණන් බාල වයස්කාර දැරියන් 6 දෙනෙකුට එරෙහිව ලිංගික අපරාධ සිදු කිරීම සම්බන්ධයෙන් වික්ටෝරියා ප්‍රාන්ත අධිකරණ ජූරි සභාවක් විසින් වරදකරු කර තිබේ.
ඔස්ට්‍රේලියානු මාධ්‍ය වාර්තා කර ඇත්තේ, වසර 30කට පෙර සිට සිදු කළ බවට පැවසෙන මෙම අපයෝජන සම්බන්ධයෙන් වූ චෝදනා 17කට 70 හැවිරිදි වියේ පසුවන මෙම හිමියන් වරදකරු වී ඇති බවයි.
ඊයේ (30) දින වික්ටෝරියා ප්‍රාන්ත අධිකරණයේ ජූරි සභාවක් විසින් මෙම තීන්දුව ලබා දී ඇත.
මේ අතර ජූරි සභාව අධිකරණ කාමරයෙන් පිටව ගිය පසු භික්ෂුවට සහය දැක්වීම සඳහා පැමිණි පිරිස් දැඩි ලෙස හඬා වැටුණු බව එරට මාධ්‍ය වාර්තා කරයි.
1994 වසරේ සිට 2002 වසර දක්වා කාලය තුළ විහාරාධිපති හිමියන් මෙම අපරාධය සිදු කර ඇති අතර වයස අවුරුදු 16ට අඩු දැරියන් සමඟ ලිංගිකව හැසිරීම සම්බන්ධ චෝදනා 8කට සහ වයස අවුරුදු 16ට අඩු දැරියන් සමඟ අශෝභන ක්‍රියා සිදු කිරීමේ චෝදනා 9කට වරදකරු වී ඇත.
උන්වහන්සේ වැඩ විසූ ස්ථාන දෙකකදී බාල වියේ පසුවූ වින්දිත දැරියන්ට රසකැවිලි ලබා දී තම ආවාසයට ගෙන්වා ගෙන ඇති බවට චෝදනා එල්ල වී තිබේ.
විජිත නායක හිමියන්ට එරෙහිව, දැරියන් කිහිප දෙනෙකු අනිසි ලෙස ස්පර්ශ කළ බවට ලැබුණු පැමිණිලි 3ක් මත වික්ටෝරියා පොලීසියේ ලිංගික අපරාධ මර්දන අංශය අධිකරණය හමුවේ චෝදනා ගොනු කර තිබුණි.
මෙම අපරාධවලට වරදකරු වූ හිමිනමට වික්ටෝරියානු නීතිය යටතේ වසර 10කට වැඩි සිර දඬුවමක් නියම වීමට ඉඩ ඇති බවට ඕස්ට්‍රේලියානු මාධ්‍ය අනාවරණය කරයි.
අශෝභන ක්‍රියාවක නිරත වීමේ චෝදනා අතුරින් එක් චෝදනාවකින් ජූරි සභාව උන්වහන්සේව නිදහස් කර ඇති අතර, තවත් එක් චෝදනාවක් සම්බන්ධයෙන් අවසන් එකඟතාවකට පැමිණීමට නියමිත බවද එරට මාධ්‍ය වාර්තා කර ඇත.
වයස අවුරුදු 15 දී පැවිදි දිවියට එළඹුණු උන්වහන්සේ, විශ්ව විද්‍යාලයේ මිතුරෙකුගේ ආරාධනයෙන් ස්වීඩනයේ ස්ටොක්හෝම්හි පිහිටි බෞද්ධ විහාරස්ථානයක වසර 07ක කාලයක් ධර්මදූත සේවාවේ නිරත වී තිබුණි.
1994 වසරේ මුල් භාගයේදී, ඕස්ට්‍රේලියාවේ බෞද්ධ සංගමයේ ආරාධනයකට අනුව ස්වීඩනයේ සිට වික්ටෝරියා ප්‍රාන්තයට වැඩම කර තිබේ.
උන්වහන්සේ විහාරාධිපති ලෙස වැඩම කිරීමට පෙර, එම විහාරස්ථානයේ විහාරාධිපති ලෙස අපවත්වී වදාළ පූජ්‍ය ගංගොඩවිල සෝම හිමියන් කටයුතු කර තිබේ.
