වවුනියාව විශ්වවිද්‍යාලයේ ඊයේ රාත්‍රියේ පැවති සාදයක් අතරතුර විශ්වවිද්‍යාල සිසුවෙකු ජීවිතක්ෂයට පත්ව ඇති බව වාර්තා වේ.
ඊයේ රාත්‍රියේ වවුනියාව විශ්වවිද්‍යාලය තුළ පැවැත්වූ සාදයක් අතරතුර ශිෂ්‍ය කණ්ඩායමක් විසින් තවත් ශිෂ්‍යයෙකු හට බලහත්කාරයෙන් මත්පැන් පොවා ඇති බවත්, ඉන් පසු එම සිසුවා ජීවිතක්ෂයට පත් ව ඇති බවත්, ඔහු යම් රෝගී තත්වයන්ගෙන් ද පෙළුණ අයෙක් බවත් වාර්තා වේ.
කෙසේ නමුත් වවුනියාව සහ පුවරසන්කුලම පොලිස් ස්ථානාධිපතිවරුන්ගෙන් කල විමසීමකදි සිසුවෙකු ජීවිතක්ෂයට පත් වීමේ සිද්ධිය සත්‍යයක් බවත්, මරණයට හේතුව මෙ වන තෙක් අනාවරණය වී නොමැති බවත් තහවුරු කර ඇත.
මේ වන විට සිසුවාගේ දේහය පුවරසන්කුලම රෝහලේ තැන්පත් කර ඇති බවත්, පශ්චාත් මරණ පරීක්ෂණය සඳහා එය වවුනියාව දිස්ත්‍රික් මූලික රෝහලට රැගෙන ඒමට නියමිත බවත් රෝහල් පොලිසියෙන් තහවුරු කර‍යි.
මෙය නවක වද සිද්ධියක් හා සෘජුව සම්බන්ධ ද යන්න සහ මියගිය සිසුවාට බලහත්කාරයෙන් මත්පැන් (කසිප්පු හෝ වෙනත් විෂ විය හැකි මත්පැන් වර්ගයක් බවට සැක සහිත වේ) පොවා ඇති බවක් පිළිබඳ දැනට විශ්වසනීය තොරතුරු ලැබී නොමැත.
කෙසේ නමුත් මෙම සිද්ධිය සිදු වී ඇත්තේ සිසුන් විසින් සංවිධානය කරන ලද සාදයක් අතරතුර බව කරුණු තහවුරු කර ඇත.
