කැලණිය විශ්වවිද්‍යාලයේ සමාජීය විද්‍යා පීඨයේ දේශපාලන විද්‍යා අධ්‍යයන අංශය සහ එෆ්රියල් තරුණ ජාලයේ (AFRIEL Youth Network) ඒකාබද්ධ සහයෝගයෙන් පවත්වනු ලබන ‘සහභාගීත්ව ප්‍රජාතන්ත්‍රවාදය පිළිබඳ සහතික පත්‍ර පාඨමාලාවේ’ සමාරම්භක උත්සවය ඊයේ (02) සාර්ථකව පවත්වන ලදී.
මෙම උත්සවය සමගම, පාඨමාලාව සඳහා තෝරාගත් රජයේ ග්‍රාමීය ක්ෂේත්‍ර නිලධාරීන් පිරිසක් වෙනුවෙන් තෝරාගැනීමේ ලිපි ප්‍රදානය කිරීම ද සිදු විය.
ඒ සඳහා විශ්ව විද්‍යාලය මඟින් රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ සහයෝගය ඇතිව කඩයිම් පරීක්ෂණයක් සහ සම්මුඛ පරීක්ෂණයකින් ග්‍රාම නිලධාරීන්, ආර්ථික සංවර්ධන නිලධාරීන්, කෘෂිකර්ම පර්යේෂණ නිෂ්පාදන සහකාර, ගොවිජන සේවා නිලධාරීන් ඇතුලු ග්‍රාමීය මට්ටමේ ක්ෂේත්‍ර නිලධාරීන් 100ක් පළමු කණ්ඩායම් දෙක සඳහා තෝරා ගෙන තිබේ.
මෙම පාඨමාලාව තුළින් රජයේ ග්‍රාමීය ක්ෂේත්‍ර නිලධාරීන් වෙත ප්‍රජාතන්ත්‍රවාදී පාලනය, යහපාලනය සහ සිවිල් සහභාගීත්වය පිළිබඳ ගැඹුරු දැනුමක් සහ ප්‍රායෝගික පුහුණුවක් ලබා දීම අපේක්ෂා කෙරෙන අතර පාඨමාලා සම්බන්ධීකාරක ආචාර්ය නදීකා දමයන්ති විසින් එහි අරමුණු පැහැදිලි කරමින්, මෙය ශ්‍රී ලංකාවේ ප්‍රජාතන්ත්‍රවාදී භාවිතාව ශක්තිමත් කරන රාජ්‍ය සේවකයන් බිහිකිරීමේ ප්‍රධාන පියවරක් බව අවධාරණය කළාය.
පාඨමාලාව සඳහා සහයෝගීත්වය සපයන එෆ්රියල් තරුණ ජාලයේ සභාපති රවීන්ද්‍ර ද සිල්වා අදහස් දක්වමින්,
“අප රටේ ග්‍රාමීය රජයේ සේවයේ ප්‍රජාතන්ත්‍රීය වටිනාකම්, අවබෝධය සහ කැපවීම වෙනුවෙන් ආයෝජනය කිරීමට ලැබීම අපට මහත් සතුටක්. මෙම වැඩසටහන රටේ ග්‍රාමීය සංවර්ධනයට විශාල ශක්තියක් ලබා දෙනු ඇතැයි අපි විශ්වාස කරනවා. ඒ වගේම ඉදිරි වසර සඳහා මෙම පාඨමාලාව සඳහා මිලියන 8ක මුදලක් වෙන් කර තිබෙනවා වගේම මෙම පාඨමාලාවේ ඉදිරි සංවර්ධන කටයුතු කිරීමට බලාපොරොත්තු වනවා.”
මෙම අවස්ථාවට ප්‍රධාන ආරාධිතයා ලෙස කැලණිය විශ්වවිද්‍යාලයේ සමාජීය විද්‍යා පීඨයේ පීඨාධිපති සහ වැඩබලන උපකුලපති මහාචාර්ය එම්. එම්. ගුණතිලක සහභාගී වූ අතර, එෆ්රියල් තරුණ ජාලයේ නියෝජ්‍ය විධායක අධ්‍යක්ෂ විමුක්ති දුෂාන්ත විසින් පාඨමාලාව සඳහා සකස් කරන ලද අතිරේක කියවීම් පොත් කට්ටලය දේශපාලන විද්‍යා අධ්‍යයන අංශයේ අංශාධිපති මහාචාර්ය ඔසන්ත තල්පාවිල වෙත භාර දෙන ලදී.
තවද, මෙම අවස්ථාව සඳහා කැලණිය විශ්ව විද්‍යාලය නියෝජනය කරමින් සමාජ විද්‍යා අධ්‍යයන අංශයේ අංශාධිපති විශේෂඥ මහාචාර්ය කේ. කරුණාතිලක, ආර්ථික විද්‍යා අධ්‍යනය අංශයේ අංශාධිපති ජේෂ්ඨ මහාචාර්ය ඩබ්ලිව්. එම්. සේමසිංහ, ජාත්‍යන්තර අධ්‍යනය අංශයේ අංශාධිපති යමුනා මෙන්ඩිස් ඇතුලු අධ්‍යයන සහ අනධ්‍යයන කාර්යමණ්ඩලයේ මහත්ම මහත්මීන් රැසක් සහ එෆ්රියල් ආයතනය නියෝජනය කරමින් එහි අධ්‍යක්ෂ මණ්ඩලය ඇතුලු පිරිසක් සහභාගී වූහ.
ප්‍රජාතන්ත්‍රවාදය සහ යහපාලනය පිළිබඳ දැනුමෙන් සන්නද්ධ වන මෙම ක්ෂේත්‍ර නිලධාරීන්, ඔවුන්ගේ ප්‍රජාවන්ගේ සංවර්ධනයට සහ ශ්‍රී ලංකාවේ යහපත් පාලනයට ශක්තිමත් දායකත්වයක් ලබා දෙනු ඇතැයි විශ්වවිද්‍යාලය සහ AFRIEL Youth Network විශ්වාසය පළ කරයි.
