තණකොළ කැපීම සඳහා පොරොන්දු වූ කුලී මුදල ලබා නොදීම සම්බන්ධයෙන් ඇතිවූ බහිනබස් වීමක් මත නිවෙස් හිමියකුට පොරවකින් පහර දී ඝාතනය කළ පුද්ගලයකු එළැඹෙන 17 වැනිදා දක්වා රක්ෂිත බන්ධනාගාරගත කරන ලෙස මොරටුව මහෙස්ත්‍රාත්වරයා නියම කර ඇත.
මෙලෙස රක්ෂිත බන්ධනාගාරගත කර ඇත්තේ 48 හැවිරිදි රාවතාවත්ත පදිංචි තණකොළ කපන කුලීකරුවකු වන අතර ඔහු දැඩි ලෙස හෙරොයින්වලට ඇබ්බැහි වී ඇති පුද්ගලයකු බව පොලිසිය පවසයි.
මෙම සිද්ධියෙන් මියගොස් ඇත්තේ 83 හැවිරිදි මොරටුමුල්ල, ද සොයිසා පාර අතුරු මාර්ගයක නිවසක තනිව විසූ පුද්ගලයෙකි.
මරණකරුගේ බිරිඳ වසර තුනකට පමණ ඉහතදී මියගොස් ඇති අතර ඔහු බිරිඳ ජීවත්ව සිටි සමයේදී සියලු දේපළ ඥාතීන්ට බෙදා දී අසල්වැසියකුටද සිය දේපළ ලියා ඇතැයි පොලිසිය පවසයි.
මරණකරුගේ ඥාතියකු දුරකථන ඇමතුමක් ලබාගත්තද එයට ප්‍රතිචාර නොදැක්වීම හේතුවෙන් ඒ පිළිබඳව හිතවතකුගෙන් විමසා සොයා බැලීමේදී මරණකරු නිවසේ සාලය මැද වැටී සිටියදී හමුව ඇත.
ඒවන විටත් මරණය සිදුවී දින දෙකක් පසුවී ඇති බව මූලික පරීක්ෂණවලින් පොලිසිය තහවුරු කරගෙන ඇත.
සිද්ධිය සම්බන්ධයෙන් හදිසි මරණ පරීක්ෂක පියල් ගයාන් පෙෙ‌ර්රා ස්ථානීය පරීක්ෂාවක් සිදු කර ඇති අතර අධිකරණ වෛද්‍යවරයා වෙත යොමු කිරීමේදී දේහය මුද්‍රා කර භූමදාන කටයුතු සිදු කිරීමට නියම කෙරිණි.
මොරටුව මූලස්ථාන පොලිස් පරීක්ෂක නිහාල් ෆ්‍රැන්සිස්, අපරාධ අංශයේ ප්‍රධාන පොලිස් පරීක්ෂක ගුණවර්ධන, සැරයන් ඩයස් (68884) සහ කොස්තාපල් ප්‍රදීප් (24379) මදුසංක (97398) මදුවන්ත (101590) යන නිලධාරීන් වැඩිදුර පරීක්ෂණ සිදුකරති.
