ග්‍රාමීය සංවර්ධන, සමාජ ආරක්ෂණ හා ප්‍රජා සවිබලගැන්වීම් අමාත්‍යාංශය සහ වැවිලි හා ප්‍රජා යටිතල පහසුකම් අමාත්‍යාංශය අතර පසුගිය දා අත්සන් කරන ලද අවබෝධතා ගිවිසුමකට අනුව ගෙවතු පොල් වගාවට පොල් පැළ ලක්ෂ පහක් නොමිලේ බෙදා දීම අම්පාර උහන දී ආරම්භ කිරීමට පොල් වගා කිරීමේ මණ්ඩලය සූදානම් වෙයි .
පොල් වගාව රට පුරා ප්‍රවර්ධනය කිරීමේ අරමුණින් ඒකාබද්ධ වැඩසටහනක් ලෙස මෙය ක්‍රියාත්මක කරනු ලබයි.
ඒ අනුව මෙම මස 09 වැනි ඉරිදා දින පෙරවරු 10ට මෙම වැඩසටහන ආරම්භ කිරීම්ට නියමිතව තිබේ.
වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න සහ ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීම් නියෝජ්‍ය අමාත්‍ය වසන්ත පියතිස්සගේ ප්‍රධානත්වයෙන් මෙම වැඩසටහනේ සමාරම්භය අම්පාර උහන නගරයේදී සිදු කිරීමට සියළු කටයුතු සූදානම් කර තිබේ.
මෙම අවස්තාවේදී උතුරු පොල් ත්‍රිකෝණය සඳහා තෝරාගත් යාපනය, කිලිනොච්චිය, මුලතිව්, මන්නාරම සහ වවුනියාව යන දිස්ත්‍රික්ක පහ හැර ලංකාවේ සෙසු දිස්ත්‍රික්ක සියල්ලම ආවරණය වන පරිදි ප්‍රතිලාභී පවුල් ලක්ෂ 2.5ක් සඳහා පොල් පැළ ලක්ෂ 05ක් නොමිලේ බෙදා දීමට සැලසුම් කර ඇත.
මෙමගින් අක්කර 7,812ක පොල් වගාවක් ඇති කිරීමට බලාපොරොත්තු වන අතර ප්‍රජා ශක්ති කමිටු මගින් එම ලේඛනය තෝරාගනු ලැබේ.
ප්‍රාදේශිය සම්බන්ධීකරණ කමිටු මගින් අනුමත කරගත් එම ප්‍රතිලාභීන්ගේ දෛනික පරිභෝජනය සඳහා පොල් තම ගෙවත්තෙන්ම ලබා ගැනිමට හැකි වන පරිදි මෙම වැඩසටහන ක්‍රියාත්මක කිරීමට නියමිතව ඇත.
එමෙන්ම පොල් පැළ බෙදාදීමේ සිට පොල් අස්වැන්න නෙළන අවස්ථාව තෙක්ම පොල් වගා කිරීමේ මණ්ඩලයේ ප්‍රාදේශීය නිලධාරින් සමග ප්‍රජා ශක්ති කමිටුවේ නිලධාරීන් විසින් පුර්ණ අධීක්ෂණයක් සිදු කරනු ඇත.
