කොටුව පොලිස් වසමේ පිහිටි ප්‍රධාන පෙළේ හෝටල් කාමරයක රැඳී සිටි නෙදර්ලන්ත ජාතික කාන්තාවකගේ මුදල් පසුම්බියක් සොරාගත් සැකකරුවෙකු අත්අඩංගුවට ගෙන ඇත.
ඊයේ (13) දින කොටුව පොලීසියට ලද පැමිණිල්ලක් මත වහාම ක්‍රියාත්මක වූ පොලීස් නිලධාරින් විසින් මෙලෙස සැකකරු අත්අඩංගුවට ගෙන තිබේ.
මෙම විදෙස් ජාතික කාන්තාව තවත් කාන්තාවක් සමඟ අදාළ හෝටලයේ විශේෂ අමුත්තන් ලැඟුම් ගන්නා කාමරයක නවාතැන්ගෙන සිට ඇති අතර, ඇයගේ මුදල් පසුම්බියේ තිබූ ඩිරාම් සහ යුරෝ මුදල් (මෙරට මුදලින් රුපියල් 330,000) අස්ථානගතවී ඇති බව පොලීසිය සඳහන් කරයි.
සැකකරු අවුරුදු 41ක කඳාන ප්‍රදේශයේ පදිංචිකරුවෙකු වන අතර සැකකරුගෙන් සිදුකළ ප්‍රශ්න කිරීමේදී විදෙස් ජාතික කාන්තාවන් එහි කාමරයේ නොමැති අවස්ථාවක මෙම සොරකම සිදුකර ඇති බවත් සොරාගත් විදෙස් මුදල් ජාඇළ ප්‍රදේශයේ පිහිටි මූල්‍ය ආයතනයකින් මාරුකර ඇති බවටත් අනාවරණය වී ඇත.
අත්අඩංගුවට ගත් සැකකරු අද (14) කොටුව මහෙස්ත්‍රාත් අධිකරණයට ඉදිරිපත් කිරිමට නියමිත අතර කොටුව පොලීසිය වැඩිදුර විමර්ශන සිදුකරන බව සඳහන් වේ.
