ඉන්දීය ප්‍රවීණ නළු ධර්මේන්ද්‍ර දිවියෙන් සමුගෙන ඇති බව ඉන්දීය මාධ්‍ය වාර්තා කරයි.
මිය යන විට ඔහු අවුරුදු 89 වැනි වියේ පසු වු අතර මුම්බායි පිහිටි ඔහුගේ නිවසේදී ඔහු මියගොස් ඇති බවයි සදහන් වන්නේ.
හුස්ම ගැනීමේ අපහසුතාවයක් හේතුවෙන් පසුගිය දින කිහිපයේ ද ඔහු රෝහල් ගත කර තිබු අතර එළැඹෙන දෙසැම්බර් 8 වන දිනට ඔහුට අවුරුදු 90 ක් සපිරෙන බවද සඳහන් වේ.
1960 දී “දිල් බි තේරා හම් බි තේරේ” සමඟින් සිය මංගල දර්ශනය ආරම්භ කළ ධර්මේන්ද්‍ර, 1960 දශකයේ අන්පාද්, බන්දිනි, අනුපමා සහ ආයා සවන් ජූම් කේ වැනි චිත්‍රපටවලින් සිය වෘත්තීය ජීවිතය ආරම්භ කර ඇත.
පසුව ඔහු ෂෝලේ, ධරම් වීර්, චුප්කේ චුප්කේ, මේරා ගාඕන් මේරා දේශ් සහ ඩ්‍රීම් ගර්ල් හි ප්‍රධාන චරිත නිරූපණය කිරීමට සමත් විය.
ධර්මේන්ද්‍ර අවසන් වරට පෙනී සිටියේ ෂාහිඩ් කපූර් සහ ක්‍රිටි සැනොන් රඟපෑ Teri Baaton Mein Aisa Uljha Jiya චිත්‍රපටයේ වන අතර ඔහුගේ මීළඟට තිරගත වීමට නියමිත සිනමා පටය වන්නේ අමිතාබ් බච්චන්ගේ මුනුබුරා වන අගස්ත්‍ය නන්දා ප්‍රධාන චරිතය රඟදක්වන “ඉකිස්” චිත්‍රපටයයි .
චිත්‍රපටිය දෙසැම්බර් 25 වනදා ප්‍රදර්ශනය කිරීමට නියමිත බවද සඳහන් වේ.
