ආපදා සහන සේවා කටයුතු වෙනුවෙන් මේ වන විට රජය රු. බිලියන 1.2 මුදලක් වෙන් කර තිබෙන අතර ඊට අමතරව තවත් අවශ්‍ය මුදලක් ඉල්ලා සිටින ලෙස ජනාධිපතිවරයා විසින් රාජ්‍ය පරිපාලන, පළාත් සභා සහ ස්වදේශ කටයුතු අමාත්‍යංශයේ ලේකම්වරයා මගින් සියලු දිසාපතිවරුන් දැනුවත් කර තිබේ.
ඒ අනුව සියලුම අපදා කළමනාකරණයන් විධිමත්ව ක්‍රියාත්මක කරමින් තිබෙන අතර පොලීසිය, හමුදාව ඇතුළු ආරක්ෂා අංශ සහ සෙසු රාජ්‍ය ආයතන විසින් එම කටයුතු කළමනාකරණය කරමින් පවතියි.
මේ අතර ඊයේ (27) ජනාධිපතිවරයා විසින් ආපදාවට ලක්ව සිටින දිස්ත්‍රික්කවල මන්ත්‍රීවරු වෙත අවධාරණය කර තිබුණේ අවශ්‍ය ප්‍රතිපාදන රජය විසින් සපයන හෙයින් එම ප්‍රදේශවලට ගොස් අවශ්‍ය කටයුතු සඳහා මැදිහත්වන ලෙසයි.
”පුළුවන් අය අදම දිස්ත්‍රික්කවලට යන්න. ඔයගොල්ලන්න්ට මොනවා හරි ප්‍රශ්න තියෙනවා නම් ආනන්ද ඇමතිතුමාට කතා කරන්න. එතුමා කෝඩිනේට් කරලා දෙයි ඔක්කොම ටික. අවශ්‍ය කරන චක්‍රලේඛ තියෙනවා නම් කතා කරලා ජනාධිපති ලේකම්තුමා එක්ක කතා කරලා වෙනස් කරලා යවන්න. ආපදා සඳහා මේ වසරේ වෙන් කරපු මුදල් තියෙනවා. ඒ මුදල් මුළුමනින්ම වියදම් වෙලා නැහැ. ආපදා තත්ත්වයක් අපේක්ෂා කරපු දිස්ත්‍රික්කවලට මුදල් යවල තියෙනවා. ඒ මුදලුත් තාම තියෙනවා. ඒ නිසා මම හිතන්නේ මුදල්වල ප්‍රශ්නයක් නැහැ. ඔයාල ගිහින් හදන්න වැඩ. ඒවාට අවශ්‍ය මුදල් ප්‍රතිපාදන අපි එවන්නම්. නාය යාම් ප්‍රදේශවල ලක්ෂ 32 දක්වා දෙන්න තීරණය කරලා තියෙනවා ඉඩමක් ලක්ෂ 7ක් සහ නිවසක් හදාගන්න ලක්ෂ 25ක් කියන පදනමින් තීරණ අරන් තියෙන්නේ.”
මේ අතර ජාතික ආපදා කළමනාකරණ සභාවද ජනාධිපති අනුර කුමාර දිසානායකගේ ප්‍රධානත්වයෙන් රැස් වී තිබුණ අතර ආපදා තත්ත්වය හමුවේ ගත යුතු ඉදිරි ක්‍රියාමාර්ග පිළිබඳව එහිදී පුළුල්ව විමසා බලා ඇත.
