කොත්මලේ රම්බොඩ ප්‍රදේශයේ සිදුවූ නායයෑමෙන් තවත් මළසිරුරු 7ක් සොයා ගැනේ. තවත් 25 දෙනෙකු අතුරුදහන්ව ඇති බව ආරංචි මාර්ග සඳහන් කරයි.
මෙම නායයෑම පසුගිය 27 වනදා රාත්‍රීයේ සහ ඊයේ (28) දින පාන්දර වනවිට සිදුව ඇතැයි එම ස්ථානයේ නිවසක සිටින පුද්ගලයෙකු විසින් අනාවරණය කරනු ලැබුවා.
කෙසේවෙතත් නුවරඑළිය – පූඬළුඔය මාර්ග දෙක අතර රම්බඩගම ගම්මානය මැද කොටස මෙලෙස නායගොස් ඇතැයි අනාවරණය වුණි.
එම ස්ථානයේ නායයෑම හේතුවෙන් මියගිය පුද්ගලයින්ගේ සිරුරු පවා ඇති අතර, ඒවා ඉවත් කිරීමට හෝ තුවාලකරුවන් රෝහල්ගත කිරීමට නොහැකිව ප්‍රදේශවාසීන් දැඩි අසීරුතාවයකට පත්ව ඇති බව වාර්තා වුණි.
කෙසේවෙතත් මේ වනවිටත් එම ප්‍රදේශයට විදුලිය නොමැති අතර, දුරකථන සංඥා සියල්ල ක්‍රියා විරහිත වී ඇත.
පුද්ගලයින් 50කට ආසන්න සංඛ්‍යාවක් එම නායයෑම හේතුවෙන් එම ස්ථානයේ සිරවී ඇති අතර, අවට ජනතාව මුදාගැනීමට කඩිනමින් අවශ්‍ය පියවර සකස් කර දෙන ලෙස එම ස්ථානයේ විපතට පත් ජනතාවගේ ඥාතීන් රජයෙන් ඉල්ලා සිටී.
එම ස්ථානයට ළඟා වීම සම්පූර්ණයෙන්ම අවහිර වී ඇති අතර, ආපදා සහන කණ්ඩායම් කිසිවෙකු මේ වන තෙක් අදාළ ස්ථානයට ළඟා වී නොමැති බව ද වාර්තා වේ.
සන්නිවේදන සබඳතා බිඳවැටීම හේතුවෙන් මේ පිළිබඳ තොරතුරු ලබාගැනීම අසීරු වන බව ද පොලීසිය සඳහන් කරයි.
