ශ්‍රී පාද මළුවේ නායයෑමක් සිදු වී ඇති බවට සමාජ මාධ්‍යයන්හි පලවන පුවත්වල කිසිදු සත්‍යතාවක් නොමැති බව ශ්‍රී පාදස්ථානාධිපති බෙන්ගමුවේ ශ්‍රී ධම්මදින්න හිමියෝ පැවසූහ.
මාධ්‍ය වෙත විශේෂ ප්‍රකාශයක් කරමින් උන් වහන්සේ පවසා සිටියේ, සෑම වසරකම අධික වර්ෂාව පවතින කාලයේ ශ්‍රීපාද මළුවට පහළින් පර්වතයේ වැවී ඇති ශාක වර්ග වර්ෂාවත් සමග පහළට කඩා වැටෙන බවය.
එය ස්වාභාවික සිද්ධියක් බවත්, මෙම සිද්ධිය සිදු වී ඇත්තේ හැටන් සහ රත්නපුර මාර්ගය සම්බන්ධවන ඉදිකටු පහණ මාර්ගයට සම්බන්ධවන ප්‍රදේශයේ බවත් උන් වහන්සේ පැවසූහ.
එනිසා ශ්‍රීපාද මළුවට හෝ ශ්‍රී පාදස්ථානයට කිසිදු බලපෑමක් සිදු වී නොමැති බව ශ්‍රී පාදස්ථානාධිපති හිමියෝ පැවසූහ.
