පැවැති අයහපත් කාලගුණය හේතුවෙන් පැන නැගුණු හදිසි ආපදා තත්ත්වය මත බලපෑමට ලක්වූ කර්මාන්ත නැවත යථා තත්ත්වයට පත් කිරීම සඳහා රජය විසින් ලබා දෙන රුපියල් ලක්ෂ 02ක දීමනාව සම්බන්ධව කර්මාන්ත හා ව්යවසායකත්ව සංවර්ධන අමාත්යාංශය විසින් නිවේදනයක් නිකුත් කර ඇත.
එහි සඳහන්ව ඇත්තේ කර්මාන්ත සහ ව්යවසායකත්ව සංවර්ධන අමාත්යාංශයේ ලියාපදිංචි කර්මාන්ත සහ අමාත්යාංශය යටතේ ක්රියාත්මක වන ශ්රී ලංකා අපනයන සංවර්ධන මණ්ඩලය, කාර්මික සංවර්ධන මණ්ඩලය, ජාතික ව්යවසායකත්වය සංවර්ධන අධිකාරිය, කුඩා ව්යාපාර සංවර්ධන අංශය, ජාතික ඵලදායිතා ලේකම් කාර්යාලය, ජාතික ශිල්ප සභාව හා ජාතික මෝස්තර මධ්යස්ථානය යන ආයතනවල ලියාපදිංචි ආපදාවට ලක්වූ කර්මාන්තකරුවන්ට මෙම ලක්ෂ 2ක මුදල ලබා ගැනීමේ හැකියාව පවතින බවයි.
මේ සඳහා කර්මාන්ත හිමියන් විසින් www.industry.gov.lk වෙබ් අඩවිය හරහා හෝ දිස්ත්රික් ලේකම් කාර්යාල හා ප්රාදේශීය ලේකම් කාර්යාලවල සිටින ව්යවසායකත්ව සංවර්ධන නිලධාරීන්, කුඩා ව්යාපාර සංවර්ධන නිලධාරීන්, අපනයන සංවර්ධන නිලධාරීන් හා ඵලදායිතා ප්රවර්ධන නිලධාරීන් මගින් මෙම දීමනාව ලබාගැනීම සඳහා ඉල්ලීම් සිදුකළ හැකි බවද අමාත්යාංශය සඳහන් වේ.
එසේම ‘දිට්වා’ සුලි කුණාටුව හේතුවෙන් ආපදාවට ලක්වී ඇති කර්මාන්ත නැවත නගා සිටුවීම සඳහා එම කර්මාන්ත පිළිබඳව දත්ත ලබා ගැනීම සඳහා ක්රමවේදයක් කර්මාන්ත සහ ව්යවසායකත්ව සංවර්ධන අමාත්යාංශය විසින් දියත් කර තිබෙන අතර ආපදාවට පත් කර්මාන්ත පිළිබඳව අමාත්යාංශයට තොරතුරු ලබාදීමට “0712666660” යන දුරකථන අංකය හඳුන්වා දී ඇති අතර ආපදාවට පත්වූ කර්මාන්ත පිළිබඳව අදාළ තොරතුරු හැකි ඉක්මනින් ලබා දෙන ලෙසද අමාත්යාංශය ආපදාවට පත්වූ කර්මාන්තකරුවන්ගෙන් ඉල්ලීමක්ද සිදුකර තිබේ.
මෙම තොරතුරු ලබාදීම දෙසැම්බර් මස 16 වැනි දින පස්වරු 2ට පෙර සිදුකළ යුතු අතර තොරතුරු ඇතුලත් කිරීම www.industry.gov.lk හරහා හෝ https://aid.floodsupport.org/business-impact හරහා සිදු කළ හැකි අතර අවශ්ය සහයෝගය ඔබ අයත් ප්රාදේශීය ලේකම් කාර්යාලය මෙන්ම දිස්ත්රික් ලේකම් කාර්යාල මට්ටමෙන් සිටින කර්මාන්ත හා ව්යවසායකත්ව සංවර්ධන අමාත්යාංශයේ නිලධාරියෙකුගෙන් ද ලබා ගත හැකිය.
මෙම තොරතුරු එක්රැස් කිරීමෙන් අනතුරුව ආපදාවට ලක්වූ සියළුම කර්මාන්ත නැවත නගා සිටුවීම සඳහා අවශ්ය සහාය ලබා දීමටත් සම්බන්ධීකරණය කරගැනීමටත් අමාත්යාංශය බලාපොරොත්තු වේ.
