තලවතුගොඩ නගරයේ පිහිටි නිමි ඇඳුම් වෙළද මධ්යස්ථානයක (කාන්තා ඇඳුම්) ඇඳුම් ඇඟලා බැලීමේ කාමරයක් (ෆිටෝන් රූම්) තුළ සූක්ෂම ලෙස කැමරාවක් සඟවා එම කාමරය තුළ කාන්තාවන් ඇඳුම් මාරු කළ අවස්ථාවන් වීඩියෝ ගත කළ එම වෙළදසැලෙහි හිමිකරු අද (08) දින අත්අඩංගුවට ගත් බව තලංගම පොලිසිය පවසයි.
එලෙස අත්අඩංගුවට ගත් සැකකරුගේ ජංගම දුරකතනය පරීක්ෂා කිරීමේදී අදාල කාමරය තුළදී වීඩියෝ ගත කළ වීඩියෝ දර්ශන 201ක ප්රමාණයක් සොයා ගැනීමට හැකි වූ බව පොලිසිය සඳහන් කරයි.
මෙලෙස අත්අඩංගුවට ගෙන ඇත්තේ කොට්ටාව බංගලාවත්ත මිහිඳු මාවත ප්රදේශයේ පදිංචිකරුවකු වන සශිකුමාර් රාමනාදන් නමැති 43 හැවිරිදි ව්යාපාරිකයෙකි.
සැකකරු විසින් එලෙස ලබා ගත් වීඩියෝ අතර කාන්තාවන් තරුණියන් කුඩා දැරිවියන් තම යට ඇදුම් මාරු කරන දර්ශන ඇතුලු කාන්තාවක් නිවසක නාන කාමරයක් තුළ නිරුවතින් ස්නානය කරන දර්ශනයක් ද ඇතුළත් බවද පොලිසිය පවසයි.
සැකකරු විසින් එලෙස ලබාගත් වීඩියෝ දර්ශන අදාල දුරකතනය මගින් අන්තර්ජාලයට යොමු කර ඇති ද නැතහොත් මෙරට හෝ විදෙස් රටවල වෙබ් අඩවි සදහා විකුණා ඇතිද යන්න වැඩිදුරටත් පරීක්ෂණ කටයුතු සිදු කිරීම සදහා අදාල කැමරාව සහ ජංගම දුරකතනය භාරයට ගත් බවද පොලිසිය සඳහන් කරයි.
එසේම මෙම වීඩියෝ දර්ශන ලබාගැනීමෙන් පසු එහි සිටින තරුණියන් හෝ කාන්තාවන් බියකර ඔවුන්ගෙන් මුදල් හෝ ලිංගික අල්ලස් ලබාගෙන ඇතිද යන්න වැඩිදුරටත් පරීක්ෂණ පවත්වන බව තලංගම පොලිසිය පවසයි.
