ඉහළ කොත්මලේ ජල පෝෂක ප්රදේශවලට යළිත් මේ දිනවල ඇදහැලෙන වර්ෂාවත් සමඟ ඉහළ කොත්මලේ ජලාශයේ එක් වාන්දොරටුවක් මේ වනවිට විවෘත කර ඇති බව වාර්තා වේ.
එම ජලාශයේ ජල මටට්ම සාමාන්ය මට්ටමක පවත්වාගෙන යෑම සඳහා එම වාන් දොරටුව සුළු වර්ෂාවත් සමග විවෘත කළ බව එම ජලාශභාර ඉංජිනේරුවන් කියා සිටියේය.
ඉදිරි කාලය සඳහා ලබා දී ඇති වර්ෂා පුරෝකථනයන් අනුව මේ වන විට දිවයිනේ ප්රධාන ජලාශ කිහිපයක පවතින ජල මට්ටම් තවදුරටත් අඩු කරමින් පවතින බව වාරිමාර්ග දෙපාර්තමේන්තුව පවසයි.
එම දෙපාර්තමේන්තුවේ වාරිමාර්ග අධ්යක්ෂ ජල විද්යා හා ආපදා කළමනාකරණ ඉංජිනේරු එල්.එස් සූරියබණ්ඩාර පැවසුවේ මේ අනුව අනුරාධපුර දිස්ත්රික්කයේ නාච්චදූව, රාජාංගන, දැඳුරු ඔය, හම්බන්තොට දිස්ත්රික්කයේ ලුණුගම්වෙහෙර, වෙහෙරගල මෙන්ම අම්පාර දිස්ත්රික්කයේ සේනානායක සමුද්රයේද මේ වන විට ජල මට්ටම් අඩු කිරීම සඳහා ජලය නිදහස් කරමින් පවතින බවයි.
කෙසේ නමුත් මෙම නිදහස් කරන ජල ප්රමාණයෙන් මඟින් එහි පහළ ප්රදේශ සඳහා කිසිදු බලපෑමක් සිදුනොවන බවත් සූරියබණ්ඩාර සඳහන් කළේය.
මේ වන විට ලබා දී ඇති පුරෝකථනයන් අනුව ඉදිරියේදී වර්ෂාව ලැබීමේ හැකියාවක් පවතින බැවින් මෙම තත්ත්වයන් නිරීක්ෂණය කිරීම සඳහා වාරිමාර්ග දෙපාර්තමේන්තුව සතුව පවතින කාර්යාල පැය 24ම විවෘත කර ඇති බවත් ඒ මහතා සඳහන් කළේය.
ඒ අනුව ඉදිරියේදී ඇතිවිය හැකි තත්ත්වයන් සම්බන්ධව නිරන්තරයෙන් දැනුවත් කිරීම් සිදුකරන බවත් ඔහු පැවසීය.
තවද මෝසම් වැසි මේ වන විට සක්රීය වී ඇති බව කාලගුණවිද්යා දෙපාර්තමේන්තුව සඳහන් කර ඇති බැවින් මේ සම්බන්ධව අවධානයෙන් සිටීම වැදගත් වන නමුත් පවතින තත්ත්වයන් අනුව මේ දක්වා අවදානම් තත්ත්වයක් මතුව නැති බවත් ඉංජිනේරු එල්.එස් සූරියබණ්ඩාර වැඩිදුරටත් සඳහන් කර ඇත.
