වසරේ මේ දක්වා කාලය තුළ මෝටර් රථ ප්රවාහන දෙපාර්තමේන්තුවේ වැඩිම ප්රමාණයක් ලියාපදිංචි කර ඇත්තේ යතුරුපැදි බව එම දෙපාර්තමේන්තුව පවසයි.
මෝටර් රථ ප්රවාහන කොමසාරිස් ජනරාල් කමල් අමරසිංහ පැවසුවේ යතුරුපැදි පමණක් 223,423ක් මෝටර් රථ ප්රවාහන දෙපාර්තමේන්තුවේ ලියාපදිංචි කර ඇති බවයි.
ඉන් පසුව මෝටර් රථ 55,338ක් ද, ත්රීරෝද රථ 13,850ක්ද, මෙම කාණ්ඩ සියල්ලම ආවරණය වන පරිදි විද්යුත් වාහන 35,268ක්ද මෝටර් රථ ප්රවාහන දෙපාර්තමේන්තුවේ ලියාපදිංචි කර ඇති බවත් ඔහු සඳහන් කරයි.
මෙම වාහන ආනයනය කිරීමත් සමග මෙම වසරේ මෝටර් රථ ප්රවාහන දෙපාර්තමේන්තුවට ලබා දී ඇති ආදායම් ඉලක්ක සපුරාගෙන ඇති බවත්, දෙපාර්තමේන්තුවට මෙම වසරේ ඉලක්කය ලෙස රුපියල් බිලියන 16ක ඉලක්කයක් ලබා දුන් බවත් එම ඉලක්කය ඉක්මවා පසුගිය නොවැම්බර් 30 වන විට රුපියල් බිලියන 17.8ක ප්රමාණයක් වාර්තා කිරීමට දෙපාර්තමේන්තුව සමත් වූ බවත් ඔහු පවසයි.
එළැඹෙන වර්ෂය සඳහා රුපියල් බිලියන 18ක ආදායම් ඉලක්කයක් මහ භාණ්ඩාගාරය විසින් දෙපාර්තමේන්තුව වෙත ලබා දී ඇතැයිද එම ඉලක්කයද සපුරා ගැනීමට මෝටර් රථ ප්රවාහන දෙපාර්තමේන්තුවට හැකියාව ඇති බවත් ඔහු වැඩිදුරටත් අදහස් දක්වමින් පවසා ඇත.
