ආපදාව හේතුවෙන් වසා දැමුණු පළාත් 6කට අයත් සියලු පාසැල් දෙසැම්බර් 16 වැනිදා සිට යළි විවෘත කෙරෙන බව වාර්තා වේ.
ඒ අනුව බස්නාහිර, දකුණ, උතුර, නැගෙනහිර, සබරගමුව, උතුරුමැද පලාත්වල සියලුම පාසල් දෙසැම්බර් 16 වන දින විවෘත වේ.
අද අධ්යාපන අමාත්යංශයේ පැවති මාධ්ය හමුවක්දි අධ්යාපන අමාත්යාංශයේ ලේකම් නාලක කලුවැව මේ බව සදහන් කලේය.
මේ අතර ආපදා තත්ත්වය හේතුවෙන් හානි වූ ඌව පලාතේ පාසල් 26ක්, වයඹ පලාතේ පාසල් 6ක්, මධ්යම පලාතේ පාසල් 115ක් අධ්යයන කටයුතු සදහා විවෘත කිරිමට නොහැකි බවද ලේකම්වරයා පවසා සිටියි.
එමෙන් ම දෙසැම්බර් 16 වැනි දින ආරම්භ වන සියලු පාසල්වල විදුහල්පතිවරු, ගුරුවරු සහ අනධ්යයන කාර්ය මණ්ඩලය දෙසැම්බර් 15 වැනි දින සේවයට වාර්තා කළ යුතු බවත් පැවති ආපදා තත්ත්වයට මුහුණ දුන් ප්රදේශවල සිසුන් සහ අධ්යයන, අනධ්යයන කාර්ය මණ්ඩලයේ ඇඳුම් සම්බන්ධයෙන් ලිහිල් ප්රතිපත්තියක් අනුගමනය කරන බවත් ඔහු ප්රකාශ කළේ ය.
2025 වර්ෂයේ තෙවැනි පාසල් වාරයේ දෙවැනි අදියර 2025.12.16 දින සිට 2025.12.22 දින දක්වා පවත්වන අතර නත්තල් නිවාඩුවෙන් පසු නැවත 2025.12.29 දින සිට 2025.12.31 දින දක්වාත්, මුස්ලිම් පාසල් 2026.01.02 දින දක්වාත් පැවැත්වෙන බව ඔහු ප්රකාශ කරන ලදි.
තවද අයහපත් කාලගුණ තත්ත්වය හේතුවෙන් කල් දැමුණු අපොස උසස් පෙළ විභාගයේ ඉතිරි විශයන් ජනවාරි 12 සිට ජනවාරි 20 වන දින දක්වා පැවැත්වෙන බවද ලේකම්වරයා වැඩි දුරටත් පැවසීය.
