ව්යාජ රියදුරු බලපත්ර සකසා මුදලට අලෙවි කිරීමේ යෙදුණු බොරලැස්ගමුව වේරහැර ස්ථාන දෙකක් වටලා ව්යාජ රියදුරු බලපත්ර තොගයක් සමඟ සැකකරුවන් දෙදෙනෙකු අත්අඩංගුවට ගත් බව නුගේගොඩ කොට්ඨාස අපරාධ විමර්ශන ඒකකය පවසයි.
එම සැකකරුවන් දෙදෙනා සමඟ ව්යාජ රියැදුරු බලපත්ර 11ක් , ව්යාජ තාවකාලික රියැදුරු බලපත්ර 70ක් , තාවකාලික රියැදුරු බලපත්රවලට යොදන ස්ටිකර් 10 ක් , මොනිටරයක්, ලැප් ටොප් පරිගණකයක් හා රබර් මුද්රා 04ක් පොලිස් භාරයට ගෙන තිබේ.
බොරලැස්ගමුව වේරහැර මෝටර් රථ ප්රවාහන දෙපාර්තමේන්තුව ඉදිරිපිට ව්යාජ ලෙස රියදුරු බලපත්ර සකසා මුදලට අලෙවි කරන ස්ථාන දෙකක් කාලයක් තිස්සේ රහසිගතව පවත්වාගෙන යන බවට නුගේගොඩ කොට්ඨාස බුද්ධි අංශයේ ස්ථානාධිපතිවරයාට ලද තොරතුරකට අනුව නුගේගොඩ කොට්ඨාස අපරාධ විමර්ශන ඒකකයේ ස්ථානාධිපති පොලිස් පරීක්ෂක කේ. ජි. ජේ. කහටදෙනිය ඇතුළු කණ්ඩායමක් මෙම වැටලීම සිදුකර තිබේ.
එම එක් ස්ථානයකින් ඒවන විට ව්යාජ රියැදුරු බලපත්ර 11ක් සකස් කර තිබූ අතර අනෙක් ස්ථානයේ ව්යාජ රියැදුරු බලපත්ර 70 ක් සකස් කර තිබූ බවට තොරතුරු හෙළිවූ බව පොලිසිය පවසයි.
එක් ස්ථානයක මෝටර් රථ ප්රවාහන කොමසාරිස්ගේ අත්සන ව්යාජ ලෙස ඇතුළත් කර සකස් කරන ලද රබර් මුද්රාවක් ද තිබී පොලිසිය මගින් සොයාගෙන තිබේ.
රියැදුරු බලපත්රය කාලය නිම වී හෝ අලුතින් ලබා ගැනීමට හෝ රියැදුරු බලපත්රයට අදාල වෙනයම් ගැටලුකාරී කරුණකට මෝටර් රථ ප්රවාහන දෙපාර්තමේන්තුව අසලට පැමිණෙන පුද්ගලයන් මුලාකර මෙම ස්ථාන දෙකට සූක්ෂම ලෙස ගෙන්වාගෙන මෙම සැකකරුවන් දෙදෙනා මෙම ජාවාරම සිදු කර ඇති බවට විමර්ශනවලදී අනාවරණය වී තිබේ.
මෝටර් රථ ප්රවාහන දෙපාර්තමේන්තුව අවට තැරැව්කරුවන් යොදා රියැදුරු බලපත්රවලට අදාලව පැමිණෙන පුද්ගලයන් මුලාකර විනාඩි කිහිපයක් තුළදී රුපියල් 5000/= සිට ඉහළ මිල ගණන්වලට ව්යාජ රියැදුරු බලපත්ර සහ තාවකාලික රියැදුරු බලපත්ර විකුණා ඇති බවද විමර්ශනවලදී වැඩිදුරටත් අනාවරණය වී ඇත.
බොරලැස්ගමුව වේරහැර සහ කිරුළපන ප්රදේශවල පදිංචි සැකකරුවන් දෙදෙනා නුගේගොඩ මහේස්ත්රාත් අධිකරණයට ඉදිරිපත් කිරීමට නියමිතයි.
නුගේගොඩ කොට්ඨාස අපරාධ විමර්ශන ඒකකය පරීක්ෂණ පවත්වයි.
