හිටපු කථානායක සහ ජාතික ජනබලවේගයේ පාර්ලිමේන්තු මන්ත්රී අශෝක රන්වල පැදවූ ජීප් රථය, මෝටර් රථයක ගැටී තුන්දෙනෙකු තුවාල ලැබීමේ සිද්ධිය සම්බන්ධයෙන් වන නඩුව මහර මහේස්ත්රාත් අධිකරණයේදී අද විභාගයට ගැනුණි.
එහිදී අද දිනයේද අශෝක රන්වලගේ මූත්රා හා ලේ සාම්පල පරික්ෂාව ඇතුළත් වෛද්ය වාර්තාව අධිකරණයට ඉදිරිපත් කර නොතිබුණි.
සිදුවීමට අදාළ වෛද්ය වාර්තාව මේ වන විට රජයේ රසපරීක්ෂකවරයාට යොමුකර ඇති බවත් එහි ප්රතිපල තවමත් නොලැබී ඇති බවත් පොලීසිය අධිකරණය වෙත දැනුම් දී තිබේ.
මෙහිදී වගඋත්තරකාර පාර්ශවයේ නීතිඥවරයා අධිකරණයට දැන්වූයේ සිදුවීමෙන් තුවාළ ලබා පාදයකට හානිවී සිටින කාන්තාවට රුපියල් 50,000 ක මුදලක් සහ තුවල ලැබූ බිළිදාට සහ ඔහුගේ මවට රුපියල් 25,000 බැගින් මුල් අවස්ථාවේ ලබාදීමට කටයුතු කළ හැකි බවයි.
නඩු කටයුත්ත තවමත් විභෘග වන බැවින් වන්දි මුදලක් සම්බන්ධ වන තීරණයක් ගැනීමට නොහැකි වුවද මෙම සහනදායී මුදල ලබාගැනීමට පැමිණිලිකාර පාර්ශවය කැමැත්තක් දක්වන්නේ නම් අධිකරණය එම කටයුත්තට මැදිහත් නොවන බව මහර මහේස්ත්රාත් බණ්ඩාර ඉලංගසිංහ පවසා සිටියේය.
එහිදී පැමිණිලිකාර පාර්ශවයෙන් පාදයකට දැඩි හානි සිදුව ඇති කාන්තාවගේ සැමියා අධිකරණයට දැන්වූයේ තමන් එම මුදල ලබාගැනීමට සූදානමක් නොමැති බවයි.
මේ අතර අශෝක රන්වල තවමත් රෝහල් ගතව සිටීම සම්බන්ධයෙන් මහේස්ත්රාත්වරයා පොලීසියෙන් විමසා සිටියේ සිදුවීමෙන් තුවාල ලැබූවේ පැමිණිලිකාර පාර්ශවයද නැතහොත් විත්තිකාර පාර්ශවයද යන්නයි.
එහිදී පිළිතුරු දුන් සපුගස්කන්ද පොලිස් නිලධාරීන් සදහන් කළේ පැමිණිලිකාර පාර්ශවයේ මෝටර් රථයේ ගමන්ගත් පිරිස තුවාල ලබා රෝහල් ගත කර ඇති බවයි.
මහේස්ත්රාත්වරයා යළිත් විමසන්නේ එසේ නම් තවමත් සැකකරු තුවාල නොලබාත් තවමත් රෝහල් ගතව සිටින්නේ ඇයිද යන්නයි.
එහිදී විත්තාකාර පාර්ශවයේ නීතිඥවරයා පවසන්නේ අශෝක රංවල මහතාගේ ශාරීරික යෝග්යතාවය තවමත් යහපත් තත්ත්වයේ නොමැති බැවින් ඔහු රෝහල් ගතව ප්රතිකාර ලබන බවයි.
කරුණු සළකා බැලූ මහේස්ත්රාත් බණ්ඩාර ඉලංගසිංහ අශෝක රංවල මහතාගේ රියදුරු බලපත්රය තාවකාලිකව අවලංගු කිරීමට නියෝග කර තිබේ.
මීට අමතරව ඔහු රෝහලෙන් පැමිණි පසුව ජාතික ප්රවාහන වෛද්යාතනයෙන් යෝග්යතා පරීක්ෂණයකට සහභාගී වී එහි වාර්තාවක් ඉදිරිපත් කරන ලෙසටද නියෝග කර ඇත.
මෙම නඩුව යළිත් 2026 වසරේ ජනවාරි 16 වැනිදා කැඳවීමට නියමිතයි
