ජාතික ඖෂධ නියාමන අධිකාරිය විසින් පෞද්ගලික ඖෂධ අලෙවිසල් (ෆාමසි) වල අනිවාර්යයෙන්ම රජයේ ලියාපදිංචි ඖෂධවේදියකු රැඳී සිටිය යුතු බවට පනවා ඇති නව නීතිය හේතුවෙන් දිවයින පුරා ඇති පෞද්ගලික ඔසුසල් 4803න් ආසන්න වශයෙන් 2881ක් වැසී යාමේ අවදානමක් මතුව ඇතැයි සමස්ත ලංකා පෞද්ගලික ඖෂධ ශාලා හිමියන්ගේ සංගමය අනතුරු අඟවයි.
පෞද්ගලික ඔසුසල්වල බලපත්ර වාර්ෂිකව අලුත් කිරීම අනිවාර්ය වන අතර, ලබන පෙබරවාරි 28 වැනිදාට පෙර බලපත්ර අලුත් කිරීමේදී අදාළ ෆාමසිය තුළ වගකීම බාර ඖෂධවේදියා පූර්ණකාලීනව සේවය කළ යුතු බව ජාතික ඖෂධ නියාමන අධිකාරියේ සියලුම බලපත්රලාභීන්ට ලිඛිතව දැනුම් දී ඇත. මෙම තත්ත්වය පිළිබඳව අදහස් දක්වමින් සංගමයේ සභාපති චන්දික ගන්කන්ද මහතා පැවසුවේ, රටට අවශ්ය තරම් ඖෂධවේදීන් නොමැතිකම නිසා මෙම තීරණය හේතුවෙන් බොහෝ ෆාමසි පවත්වාගෙන යාම අර්බුදයකට ලක්වන බවයි.
මේ අතර, ෆාමසි අතර දුර සීමාව ජනවාරි 01 වැනිදා සිට ඉවත් කර ඇති අතර, ඒ සමඟ අනිවාර්ය කොන්දේසි තුනක් ඇතුළත් කරමින් ජාතික ඖෂධ නියාමන අධිකාරියෙහි ප්රධාන විධායක නිලධාරී වෛද්ය කේ. එම්. පී. කේ. බණ්ඩාර මහතා සියලුම බලපත්රලාභීන්ට දැනුම් දී තිබේ. ඒ අනුව, අයැදුම්කරු ෆාමසියෙහි තනි හිමිකරු විය යුතු අතර, ඖෂධවේදියා පූර්ණකාලීනව එහි සේවය කළ යුතුය. තවද, 2015 අංක 5 දරණ ජාතික ඖෂධ නියාමන අධිකාරියේ පනත සහ රෙගුලාසිවලට අනුව අනෙකුත් නිර්ණායක සපුරාලිය යුතුය. එසේම, ස්ථානීය අනුමැතිය නිකුත් කිරීමෙන් පසු සම්මුඛ පරීක්ෂණයට පෙර ව්යාපාර ලියාපදිංචි සහතිකය (BRC) ඉදිරිපත් කළ යුතු බවටද කොන්දේසි ඇතුළත් කර ඇත.
මෙම වෙනස්කම් ක්රියාත්මක කිරීමේ අරමුණ නව ඖෂධ ශාලා පිහිටුවීම නියාමනය කිරීම සහ ලියාපදිංචි ඖෂධවේදීන්ගේ සෘජු අධීක්ෂණය යටතේ වෘත්තීයමය ඖෂධ සේවාවක් මහජනතාවට ලබාදීම බව NMRA වැඩිදුරටත් සඳහන් කරයි. මෙම නීතිරීති හේතුවෙන් පෞද්ගලික ඖෂධ අලෙවිසල්වලට බලපෑම් එල්ල වීම සම්බන්ධයෙන් සංගමය අධිකාරිය සමඟ සාකච්ඡාවල යෙදී සිටින බවද වාර්තා වේ.
