මහනුවර ශ්රී දළදා මාළිගාව පවත්වාගෙන යාම සඳහා වසරකට රුපියල් කෝටි 150ක ආදායමක් අවශ්ය බව දියවඩන නිලමේ ප්රදීප් නිලංග දෑල පවසයි.
ඒ අනුව දිනකට රුපියල් ලක්ෂ 50ක ආදායමක් ඇතිකර නොගත්තොත් දළදා මාලිගාව පවත්වාගෙන යාම අපහසු බවත්, එය මෙම වසරේ අභියෝගයක් බවත් හෙතෙම පවසයි.
පල්ලෙකැලේ පැවති උත්සවයකට එක්වෙමින් දියවඩන නිලමේවරයා මේ බව පවසා තිබේ.
“2005 වසරේ දළදා මාලිගාවේ වාර්ෂික ආදායම ලක්ෂ 800ක්. ඉන් ලක්ෂ 350ක පොලී ආදායමක් ලැබුණා.
නමුත් මේ අවුරුද්දේ දළදා මාලිගාව පවත්වාගෙන යන්න රුපියල් කෝටි 150ක් ඕන.
එනිසා දිනකට ලක්ෂ 50ක ආදායමක් ඇතිකර නොගත්තොත් දළදා මාලිගාව පවත්වාගෙන යාම අපහසුයි. එය මේ අවුරුද්ද වෙනකොට අභියෝගයක්.
ඒ නිසා දැවැන්ත වගකීමක් මාහට පැවරිලා තියෙනවා”
මහනුවර ඓතිහාසික ශ්රී දළදා මාළිගාවේ වත්මන් දියවඩන නිලමේ ප්රදීප් නිලංග දෑල පත්වීමෙන් අනතුරුව වසර 20ක කාලයක් පුරා දළදා මාලිගාවේ පෙරහැර ඇතුළු අනෙකුත් මංගල්යයන් හා ආගමික වතාවත් මෙන්ම විවිධ කාර්යයන් උදෙසා සහාය දැක්වූ 453 දෙනෙකු උදෙසා කෘතගුණ දැක්වීමේ ‘මෙහෙවරට බුහුමන් ” ප්රණාම උලෙළේ දී ඔහු මේ බව පවසා තිබේ.
මෙහිදී දළදා මාලිගාවේ කාර්ය මණ්ඩලය 125 දෙනෙකු, ප්රවීණ කලාකරුවෝ 210ක්, අලි ඇතුන් හිමියෝ 69 දෙනෙකු හා හස්ති පාලකවරු 39 දෙනෙකු වශයෙන් 453 දෙනෙකු ගෞරව බුහුමනට පාත්ර වූහ.
මල්වතු පාර්ශ්වයේ අනූනාහිමිවරුන් වන පූජ්ය නියංගොඩ ශ්රී විජිතසිරි, පූජ්ය දිඹුල්කුඹුරේ විමලධම්ම, අස්ගිරි පාර්ශ්වයේ අනුනායක පූජ්ය වේඩරුවේ ශ්රී උපාලි නාහිමිවරුන් ප්රමුඛ විශාල පිරිසක් මෙම අවස්ථාවට එක්ව සිටියහ.
