හිටපු අමාත්යවරුන් වන මහින්දානන්ද අලුත්ගමගේ, නලින් ප්රනාන්දු සහ ක්රීඩා අමාත්යාංශයේ හිටපු ලේකම් විශ්රාමික මේජර් ජෙනරාල් නන්ද මල්ලවාරච්චි යන අයට එරෙහිව පවරා ඇති නඩුවක මූලික විරෝධතා පිළිබඳ නියෝගය ප්රකාශ කිරීම ලබන මාර්තු මස 25 වනදා දක්වා කල් තැබීමට කොළඹ මහාධිකරණය අද (05) තීරණය කර තිබේ.
මෙම නඩුව අද කැඳවූ අවස්ථාවේදී රක්ෂිත බන්ධනාගාරගත කර සිටින හිටපු අමාත්යවරුන් වන මහින්දානන්ද අලුත්ගමගේ සහ නලින් ප්රනාන්දු යන අය බන්ධනාගාර නිලධාරීන් විසින් අධිකරණයට ඉදිරිපත් කරනු ලැබීය.
අදාළ මූලික විරෝධතා පිළිබඳ නියෝගය අද දින ප්රකාශයට පත් කිරීමට නියමිතව තිබුණද, එම නියෝගය සූදානම් නොමැති වීම හේතුවෙන් එය මාර්තු 25 වනදා ප්රකාශ කරන බව මහාධිකරණ විනිසුරු බුද්ධික සී. රාගල දැනුම් දී තිබේ.
2015 ජනාධිපතිවරණ සමයේදී හිටපු ජනාධිපති මහින්ද රාජපක්ෂගේ දේශපාලන කාර්යාල වෙත බෙදා හැරීම සඳහා කැරම් බෝඩ් සහ දාම් ලෑලි ආනයනය කර බෙදා දීමෙන් රජයට පාඩුවක් සිදු කළේ යැයි පවසමින් නීතිපතිවරයා විසින් මොවුන්ට එරෙහිව මෙම නඩුව පවරා තිබුණි.
