වස්කඩුව මනුෂ්ය ඝාතන නඩුව වසර 18 ක දීර්ඝ නඩු විභාගයකින් පසු තිදෙනෙකු වරදකරුවන් කරමින් කළුතර මහාධිකරණ විනිසුරු තාමර තෙන්නකෝන් විසින් අද මරණ දඩුවම නියම කර තිබේ.
කුඩා වස්කඩුව, ලිටිල්ටන් වත්ත ප්රදේශයේ පදිංචි සුරේෂ් කුමාර, සුගත් කුමාර නොහොත් රාළහාමි සහ සමිත සිසිර කුමාර නොහොත් බෙටා නමැති පුද්ගලයන් තිදෙනෙකු හට මෙසේ මරණ දඩුවම නියම කර තිබේ.
කුඩා වස්කඩුව ලිටිල්ටන්වත්ත ප්රදේශයේ පදිංචිව සිටී චමින්ද කුමාර නමැත්තා 2008 ඔක්තෝබර් මස 23 හෝ ඊට ආසන්න දිනක රාත්රි වස්කඩුව ප්රදේශයේ පැවති අවමඟුල් නිවසකදී පිහියකින් ඇන ඝාතනය කිරීම සම්බන්ධයෙන් කළුතර උතුර පොලිසිය විසින් අත්අඩංගුවට ගෙන අධිකරණයට ඉදිරිපත් කර තිබුණි.
කළුතර ප්රධාන මහේස්ත්රාත් අධිකරණයේ මූලික සාක්ෂි විභාග කිරීමෙන් පසු නීතිපතිවරයා විසින් මහාධිකරණය හමුවේ නඩු පවරා තිබුණි.
පසුගිය නඩු වාරයේදී පැමිණිල්ලේ සහ විත්තියේ දේශණ ඉදිරිපත් කර තිබූ අතර, තීන්දුව ප්රකාශයට පත්කිරීම අද සිදුකරන ලදී.
තීන්දුව ප්රකාශයට පත්කිරීමට පෙර මහාධිකරණ විනිසුරු විසින් මහාධිකරණ ශාලාවේ දොර ජනෙල් වසා දමා විදුලි පහන් නිවා අධිකරණ ශාලාව තුළ රැදී සිටී සියලු දෙනා අසුන්වලින් නැගිටවීමෙන් පසු තීන්දුව ප්රකාශයට පත්කර තිබුණි.
තීන්දුව ප්රකාශයට පත්කිරීමට පෙර මහාධිකරණ විනිසුරු තුමා යමක් කීමට ඇද්ද යන්න විමසා ඇති අතර, තමන් ඝාතනය සිදුනොකල බවට ඔවුන් විත්තිකරුවන් ප්රකාශ කර තිබේ.
විත්තිය වෙනුවෙන් ජේෂ්ඨ නීතිඥ කණිෂ්ක වන්නිආරච්චි ද පැමිණිල්ල වෙනුවෙන් රජයේ අධිනීතිඥ වරුන්ද , පොලිසිය වෙනුවෙන් සැරයන් මනෝජ් නිශාන් (5778) ද අධිකරණය හමුවේ පෙනී සිටියේය
