අධ්යාපන ප්රතිසංස්කරණ ක්රියාවලිය විධිමත්ව ඉදිරියට ගෙනයෑම සඳහා ජනාධිපතිවරයා විසින් විශේෂ විද්වත් කමිටුවක් පත්කිරීමට නියමිත බව වරාය සහ සිවිල් ගුවන් සේවා අමාත්ය අනුර කරුණාතිලක පවසයි.
ඊයේ (20) යාපනයේ පැවැති අධ්යාපන ප්රතිසංස්කරණ උදෙසා ජනතා ව්යාපාරය මඟින් සංවිධාන කළ සම්මන්ත්රණයකට එක්වෙමින් අමාත්යවරයා මේ බව සඳහන් කර තිබේ.
2026 වසරේ සිට ක්රියාත්මක වන මෙම ප්රතිසංස්කරණ ක්රියාවලිය සඳහා රජය රුපියල් බිලියන 17ක මුදලක් වෙන් කර ඇති බව ඔහු එහිදී පැවසීය.
එම මුදල් ප්රධාන වශයෙන් පාසල් පද්ධතියේ යටිතල පහසුකම් සංවර්ධනය සඳහා වැය කිරීමට නියමිත බව අමාත්යවරයා පවසයි.
මීට අමතරව, පවතින ගුරු හිඟයට පිළියම් ලෙස උපාධිධාරී ගුරුවරුන් 23,304ක් බඳවා ගැනීමට කැබිනට් අනුමැතිය හිමිව ඇති බව පැවසූ අනුර කරුණාතිලක මහතා පෙන්වාදෙන්නේ, ඒ සඳහා වන අයදුම්පත් කැඳවීම ලබන මාර්තු 05 වැනිදායින් අවසන් වන අතර, ඉන් අනතුරුව කඩිනමින් බඳවා ගැනීම් කටයුතු සිදුකිරීමට නියමිත බවයි.
පවතින සාමාන්ය පෙළ විභාග ක්රමය ඉදිරියටත් ක්රියාත්මක වන නමුත්, නව විෂය මාලා සංවර්ධනයත් සමඟ එහි ස්වරූපය වෙනස් වන බවද අමාත්යවරයා සඳහන් කරයි.
විශේෂයෙන් ගුරුවරයා සහ ශිෂ්යයා අතර පවතින පෞද්ගලික සම්බන්ධතා නිසා ඇගයීම් ක්රියාවලියේදී ඇතිවිය හැකි ගැටලු මඟහරවා ගැනීමට අවශ්ය නීති සහ අනුපාතයන් විද්වත් වෘත්තිකයන් විසින් තීරණය කරනු ඇති බව ඔහු පැවසීය.
පසුගියදා 6 ශ්රේණියේ ඉංග්රීසි මොඩියුලයේ ඇති වූ දෝෂ සම්බන්ධයෙන් අදහස් දැක්වූ අමාත්යවරයා, ඒ සම්බන්ධයෙන් වගකීම් විරහිතව කටයුතු කළ පුද්ගලයන්ට දැනටමත් දඬුවම් පමුණුවා ඇති බවත්, අනෙකුත් සියලු පෙළපොත් සම්බන්ධයෙන් විද්වතුන් ලවා ගැඹුරු විමර්ශනයක් සිදුකරන බවත් වැඩිදුරටත් ප්රකාශ කර තිබේ.
“අපි 2027 වසරේ ඉඳලා හය වසරේ සිට නැවත අධ්යාපන ප්රතිසංස්කරණ ක්රියාවලිය ආරම්භ කරනවා. 2026 දී හය වසරේ සිටි දරුවන්ට සහ දෙමව්පියන්ට මේ ක්රියාවලියට එක්වීමට තිබූ කැමැත්ත සැලකිල්ලට ගෙන, ඔවුන්ට හත වසරේදී හෝ මෙයට සම්බන්ධ වීමට ඇති හැකියාව ගැන අපි විද්වතුන් සමඟ සාකච්ඡා කරනවා. මෙය දේශපාලන තීන්දුවක් නොවන අතර, විද්වත් වෘත්තිකයන්ගේ උපදෙස් මත සිදුවන්නක්,”
මෙම සමස්ත ක්රියාවලිය අධීක්ෂණය කිරීම සඳහා අධ්යාපනඥයන් සහ විද්වත් වෘත්තිකයන්ගෙන් සමන්විත ජනාධිපති කමිටුවක් පත් කිරීම හරහා අධ්යාපන ප්රතිසංස්කරණවල විනිවිදභාවය සහ ප්රමිතිය ආරක්ෂා කිරීම රජයේ අරමුණ බව අනුර කරුණාතිලක පෙන්වාදෙයි.
