ශ්රී ලංකා ක්රිකට් පරිපාලනය හැකි ඉක්මනින් අතුරු පාලක කමිටුවකට හෝ බලයලත් නිලධාරියෙකු යටතට පැවරීම සම්බන්ධයෙන් ජාත්යන්තර ක්රිකට් කවුන්සිලය (ICC) සමඟ මේ වන විටත් සාකච්ඡා ආරම්භ කර ඇති බව ක්රීඩා අමාත්ය සුනිල් කුමාර ගමගේ පවසයි.
අද (05) පෙරවරුවේ පැවති විශේෂ මාධ්ය හමුවකට එක්වෙමින් අමාත්යවරයා සඳහන් කළේ, මෙරට ක්රිකට් ක්රීඩාවේ පවතින පරිපාලනමය ගැටලු විසඳා ක්රීඩාව නංවාලීම සඳහා රජය මෙම තීරණය ගෙන ඇති බවයි. ශ්රී ලංකා ක්රිකට් ආයතනයේ නිසි පාලනය සහ කළමනාකරණය සහතික කිරීම සඳහා සුදුසු යාන්ත්රණයක් හඳුනා ගැනීම මෙම සාකච්ඡාවල අරමුණ බව ඔහු සඳහන් කළේය.
මෙම තීරණාත්මක සාකච්ඡා සඳහා ජනාධිපති අනුර කුමාර දිසානායක ද සෘජුවම මැදිහත් වී ඇති බව අමාත්යවරයා මෙහිදී අනාවරණය කර ඇති අතර ඉදිරි සතියක හෝ දෙකක කාලය ඇතුළත මේ සම්බන්ධයෙන් වඩාත් සුදුසු ක්රමවේදය පිළිබඳ අවසන් තීරණයක් ගැනීමට බලාපොරොත්තු වන බව ද ඔහු වැඩිදුරටත් පවසා සිටියි.
මෙරට ක්රිකට් ක්රීඩාව යළි ජයග්රාහී මාවතකට අවතීර්ණ කරවීම රජයේ වගකීමක් බව අවධාරණය කළ ක්රීඩා අමාත්යවරයා, එහි වගකීම වෙනත් පාර්ශවයන්ට පැවරීමට රජය සූදානම් නොමැති බව ප්රකාශ කරයි.
අපේ රටේ ක්රීඩාව ගොඩ නගන්න සහ ජයග්රහණ අත්පත් කරගන්න ඕන කරන සැලසුමක් අපි මේ වන විටත් සැලසුම් කරමි තියෙන්නේ. ඒ සැලැස්ම අපි දැනටමත් යම් කිසි කොටස් කිහිපයක් අපි ඉදිරිපත් කරලා තියෙනවා. ඉදිරියේදී අපි ඒ සැලැස්ම ක්රියාත්මක කරලා අපේ රටේ ක්රිකට් ක්රීඩාව නංවන්න අනිවාර්යයෙන්ම අපි රජයක් විදිහට මැදිහත් වෙනවා. ක්රීඩාව නගා සිටුවීම අපේ අතේ තියෙන්නේ… අපිට අවශ්යතාවයක් නැහැ අපේ රටේ ක්රිකට් තහනම් කර ගන්න, අපි ඒ වෙනුවෙන් මැදහත් වෙනවා. අපි අනිවාර්යනම එක වෙන කරනවා, විශේෂයෙන්ම ජනාධිපති තුමත් ඒ සාකච්ඡාවේ ඉන්නවා.”
ශ්රී ලංකාවේ ක්රිකට් ක්රීඩාව නංවාලීම සඳහා රජය සතු වගකීම මගහැරිය නොහැකි බවත්, ඒ වෙනුවෙන් අවශ්ය විශේෂ සැලසුම් කිහිපයක් දැනටමත් සකස් කර ඉන් කොටසක් ක්රියාත්මක කර අවසන් බවත් ක්රීඩා අමාත්යවරයා මෙහිදී අවධාරණය කළේය.
ජාත්යන්තර ක්රිකට් කවුන්සිලය මගින් ශ්රී ලංකාවට යළිත් ක්රිකට් තහනමක් පැනවීමට ඉඩ නොතබන බව පැවසූ අමාත්යවරයා, ක්රීඩාවේ අඛණ්ඩ පැවැත්ම සහ වෘත්තීයභාවය තහවුරු වන පරිදි මෙම පරිපාලනමය වෙනස්කම් සිදු කිරීමට රජය උපරිමයෙන් කැපවන බව ද වැඩිදුරටත් සඳහන් කර සිටියේය
