ගල්කිස්ස අධිකරණ පරිශ්‍රය තුළදී පොලිස් කොස්තාපල් තරින්ද දිල්හාර විසින් නීතීඥ ගුණරත්න වන්නිනායකට පහරදුන් සිදුවීමට අදාළව චෝදනා එල්ලවූ පොලිස් නිලධාරියා ඇප මත මුදා හැරීමට ගල්කිස්ස මහේස්ත්‍රාත් පසන් අමරසේන නියෝග කර තිබේ.
සිදුවීම සමථයට පත් කර ගැනීමට නීතිඥ ගුණරත්න වන්නිනායකගේ කනිෂ්ඨ නීතිඥයා වන සජිත ඇන්ටනි වෙනුවෙන් පෙනී සිටි ජනාධීපති නීතිඥ ශානක රණසිංහ එකඟ වූ නමුත්, සිදුවීම සමථ මණ්ඩලය වෙත යොමු කිරීමට මහේස්ත්‍රාත්වරයා නියම කර ඇත.
එහිදී ඉදිරිපත් වූ කරුණු සලකා බැලීමෙන් අනතුරුව පොලිස් කොස්තාපල්වරයා රුපියල් ලක්ෂය බැගින් වූ ශරීර ඇප දෙකක් මත මුදා හැරීමට ගල්කිස්ස මහේස්ත්‍රාත් පසන් අමරසේන නියෝග කර තිබේ.
කොස්තාපල්වරයා වෙනුවෙන් ගල්කිස්ස මූලස්ථාන පොලිස් පරීක්ෂක එච්.ටී.එම් තුෂාර කරුණු දක්වා ඇති අතර ඔහු මේ වන විට එම තතතුරින් මාරු කර යැවීමට පොලිස්පතිවරයා තීන්දු කර තිබේ.
කොස්තාපල්වරයා පහරදීමක් සිදු කර නැති බව විමර්ශනවලදී අනාවරණය වී ඇතැයි පොලීසිය ප්‍රකාශ කළ අතර ඒ සඳහා ගල්කිස්ස මහේස්ත්‍රාත් අධිකරණයේ සීසීටීවී දර්ශන ලබා දෙන ලෙස මහේස්ත්‍රාත්වරයාගෙන් ඉල්ලීමක් කර තිබේ. කෙසේ වෙතත් මහේස්ත්‍රාත් අධිකරණයේ සීසීටීවී ක්‍රියා විරහිත බව පූර්වගාමී මහේස්ත්‍රාත්වරිය දැනුම දී ඇත.
එම අවස්ථාවේ නීතිඥවරුන් පෙන්වා දී තිබුණේ, තමා පහරදුන් බව පොලිස් නිලධාරියාම කියන වීඩියෝවක් ඇති බවයි. එසෙ වුවද පොලීසිය ප්‍රකාශ කළේ කෘත්‍රිම බුද්ධිය හරහා ඕනෑ දෙයක් නිර්මාණය කළ හැකි නිසා එය විශ්වාස කළ නොහැකි බවයි. ඔක්තෝබර් 10 උසාවි භූමියේ සිදුවීම සම්බන්ධයෙන් විමර්ශනයක් කරමින් සිටින බවත් පොලිස් කොස්තාපල්වරයා අත්අඩංගුවට ගනු ලැබුවේ විමර්ශනයකින් පසු බව පවසා ඇත.
පසුගිය 10 වැනිදා ගල්කිස්ස අධිකරණ භූමියයෙන් නීතීඥවරයෙකුගේ මෝටර් රථයක් පිටතට ගැනීමේදී ඇති වූ සිද්ධියකදී පොලිස් නිලධාරියෙකු විසින් නීතීඥවරයෙකුට පහරදුන් බවට කරන ලද පැමිණිල්ලක් අනුව ගල්කිස්ස පොලිස් ස්ථානය මගින් අදාළ පොලිස් නිලධාරියා අත්අඩංගුවට ගෙන අධිකරණයට ඉදිරිපත් කිරීමෙන් පසු අද (13) දින වන දින දක්වා රක්ෂිත බන්ධනාගාර ගතකර තිබුණා.
එම පොලිස් නිලධාරියා වෙනුවෙන් විශ්‍රාමික ජ්‍යෙෂ්ඨ නියෝජ්‍ය පොලිස්පති නීතිඥ කමල් සිල්වා ප්‍රමුඛ නීතිඥ මඬුල්ලක් පෙනී සිටි අතර මෙම සිදුවීමට අදාල චෝදනා ඇප ලබා දිය හැකි වැරදි බැවින් ඇප ලබා දෙන ලෙස ඉල්ලා සිටියේය.
පැමිණිල්ල වෙනුවෙන් පොලිස් නීති කොට්ඨාශයේ කොට්ඨාශ භාර නියෝජ්‍ය පොලිස්පති ජාලිය සේනාරත්න ඇතුළු කණ්ඩායමක් පෙනී සිටි අතර අගතියට පත් පාර්ශ්වය වෙනුවෙන් ජනාධිපති නීතිඥ ශානක රණසිංහ, ජනාධිපති නීතිඥ අනුර මැද්දෙගොඩ, කොළඹ නීතිඥ සංගමයේ නීතිඥවරුන්, ගල්කිස්ස නීතිඥ සංගමයේ නීතිඥවරුන් ඇතුළු විශාල පිරිසක් පෙනී සිට ඇත.
