වැලිගම ප්‍රාදේශීය සභාවේ සභාපති ලසන්ත වික්‍රමසේකරට වෙඩිතැබූ වෙඩික්කරුවන් පළාගිය මාර්ග කිහිපයක පොලිසිය විශේෂ මෙහෙයුමක් ආරම්භ කර තිබේ,
ඒ අනුව පොලිසිය ඒ අවට සවිකර ඇති සී.සී.ටී.වී පරික්ෂා කිරීම ආරම්භ කර ඇති බව සඳහන් වේ.
විමර්ශන සිදුකරන පොලිස් නිලධාරීන් සඳහන් කළේ, වෙඩි තැබීමෙන් අනතුරුව මාතර දෙසට පළා ගිය සැකකරුවන් දෙදෙනාගෙන් එක් අයෙකු අතරමගදී වෙනත් යතුරුපැදියකට මාරු වී ඇති බවයි.
එලෙස යතුරුපැදි දෙකකට මාරුවූ සැකකරුවන් මාතර නූපේ හන්දියේ සිට අකුරැස්ස දක්වා පැමිණ ගාල්ල දෙසට පලා ගොස් ඇති බව වාර්තා වේ.
මෙම ඝාතනය සම්බන්ධයෙන් දකුණු පළාත භාර ජ්‍යෙෂ්ඨ නියෝජ්‍ය පොලිස්පති කිත්සිරි ජයලත්ගේ අධීක්ෂණය යටතේ පොලිස් කණ්ඩායම් 4ක් මේ වන විට විමර්ශන ආරම්භ කර ඇති අතර, සිද්ධීය සම්බන්ධයෙන් මෙතෙක් කිසිවෙකුත් අත්අඩංගුවට ගෙන නොමැත.
මේ අතර, ඝාතනයට ලක්වූ වැලිගම ප්‍රාදේශීය සභාවේ සභාපති ලසන්ත වික්‍රමසේකරට රොටුඹ අමිල, කංජිපානි ඉම්රාන් සහ කෙහෙල්බද්දර පද්මේ ඇතුළු තවත් සංවිධානාත්මක අපරාධකරුවන්ගෙන් මරණ තර්ජන එල්ල වී තිබූ බවට අනාවරණය වී තිබේ.
ඒ ඔහු විසින් තම ආරක්ෂාව තහවුරු කරන ලෙස ඉල්ලා පොලිස්පතිවරයා වෙත අගෝස්තු මස 29 වැනිදා යොමුකළ ලිපිය සහ දිවුරුම් ප්‍රකාශයට අනුවයි.
අදාළ ලිපිය මගින් ඔහු ප්‍රකාශ කර ඇත්තේ තමන්ව ඝාතනය කිරීමේ ඉඩකඩක් පවතින බැවින් තම ජීවිත ආරක්ෂාව සම්බන්ධයෙන් සුදුසු පියවරක් ගන්නා ලෙසයි.
එමෙන්ම, සභාපතිවරයා පොලිස්පතිවරයාට දිවුරුම් ප්‍රකාශයක් ද යොමු කර ඇති අතර, එහිද සඳහන් වී ඇත්තේ කෙහෙල්බද්දර පද්මේ, කංජිපානි ඉම්රාන් ඇතුලු තවත් අපරාධකරුවන්ගෙන් මරණ තර්ජන එල්ල වී ඇති බවටයි.
එවන් පසුබිමක ඝාතනය සම්බන්ධයෙන් ප්‍රධානම සැකය දැනට බූස්ස බන්ධනාගාරයේ රදවා සිටින මිදිගම රුවන් හෙවත් රුවන් ජයසේකර වෙත එල්ල වී තිබේ.
විමර්ශන සිදු කරන උසස් පොලිස් නිලධාරියෙකු කියා සිටියේ පසුගිය මස 24 වැනිදා වැලිගම – ඉබ්බාවල ප්‍රදේශයේ සිදු කළ වැටලීමකදී මිදිගම රුවන්ට අයත් ගිනි අවි කිහිපයක් සමග ඔහුගේ ඥාතියෙකු අත්අඩංගුවට ගත් බවයි.
ඊට අදාළ තොරතුරු පොලිස් විශේෂ කාර්ය බලකාය වෙත ලබා දී ඇත්තේ ලසන්ත වික්‍රමසේකර බවට සැකයකින් මිදිගම රුවන් සිට ඇති බවට පොලිසියට තොරතුරු ලැබී තිබේ.
