ත්‍රිකුණාමලය, කොටුව පාරේ පිහිටි ශ්‍රී සම්බුද්ධ ජයන්ති විහාරයට අයත් ඉඩමක බුදු පිළිමයක් තැන්පත් කිරීමට යෑමේදී ඇති වූ සිද්ධිය සම්බන්ධයෙන් පොලිසිය වෙත ප්‍රකාශයක් ලබාදීම ප්‍රතික්ෂේප කළ බලංගොඩ කස්සප හිමියන්ට ලබන දෙසැම්බර් 10 දිනට පෙර අධිකරණය හමුවේ පෙනී සිටින ලෙස අද (24) ත්‍රිකුණාමල මහේස්ත්‍රාත් එම්.එන්.එම් සන්සුදීන් විසින් නොතිසි නිකුත් කර ඇත.
ත්‍රිකුණාමල වරාය පොලිස් ස්ථානාධිපති ප්‍රධාන පොලිස් පරීක්ෂක කේ. ඩබ්. ජි. එස්. කේ. සමරසිංහ අධිකරණයට බී වාර්තාව ඉදිරිපත් කරමින් කියා සිටියේ ඉකුත් 16 වන දින ඇති වූ මෙම සිද්ධිය සම්බන්ධයෙන් රෝහල් ගතවී සිටි බලංගොඩ කස්සප හිමිගෙන් වෛද්‍ය අනුමැතිය මත ප්‍රකාශයක් සටහන් කර ගැනීමට ගිය බවත්, එහිදී උන් වහන්සේ එලෙස ප්‍රකාශයක් ලබාදීම ප්‍රතික්ෂේප කළ බවත් ය.
ඒ අනුව එය ලංකා දණ්ඩ නීති සංග්‍රහයේ 184 වගන්ති ප්‍රකාරව දඬුවම් ලැබිය හැකි වරදක් බවත් අධිකරණය වෙත දැනුම් දුන් පොලිසිය විමර්ශනවලට අදාලව සහාය දැක්වීම සියලු පුරවැසියන්ගේ යුතුකමක් බව සඳහන් කරමින් රටේ සංහිඳියාව බිඳ වැටිය හැකි සිදුවීමක් වන මෙම සිදුවීමේ විමර්ශනවලට සහාය නොදක්වන ඉහත සඳහන් හිමිනමට අධිකරණයේ පෙනී සිටින ලෙසට නොතීසි නිකුත් කරන මෙන් අධිකරණය මඟින් ඉල්ලා සිටියේය.
තව ද බලන්ගොඩ කස්සප හිමි දැනට වැඩ වාසය කරන ස්ථානයක් සොයා ගැනීමට නොහැකි නිසා උන් වහන්සේ වැඩ වාසය කරන ස්ථානය සොයා ගැනීමටත්, ජාතික හැඳුනුම්පත් අංකය හා ලිපිනය තහවුරු කර ගැනීම සඳහාත්, උන්වහන්සේ භාවිතා කරන ජංගම දුරකථන අංකයට දුරකථන විශ්ලේෂණ වාර්තාවක් ලබා දෙන ලෙස පෞද්ගලික දුරකතන සමාගමක කළමනාකරුට නියෝගයක් නිකුත් කරන ලෙසත් පොලිසිය වැඩිදුරටත් අධිකරණයෙන් ඉල්ලීමක් සිදු කර ඇත.
එහි දී ඉදිරිපත් වූ කරුණු සැලකිල්ලට ගත් මහේස්ත්‍රාත්වරයා අදාළ හිමිනමට ලබන දෙසැම්බර් 10 දිනට පෙර අධිකරණය හමුවේ පෙනී සිටින ලෙස නොසිති නිකුත් කිරීමට කටයුතු කළ අතර, හිමි නම භාවිතා කරන ජංගම දුරකථන අංකයට දුරකථන විශ්ලේෂණ වාර්තාවක් ලබා දෙන ලෙස පෞද්ගලික දුරකතන සමාගමක කළමනාකරුට නියෝගයක් ද නිකුත් කර ඇත.
අවසාන වශයෙන් මහේස්ත්‍රාත්වරයා වරාය පොලිසියට වැඩිදුරටත් නියෝග කරනු ලැබුවේ, විමර්ශනවලට අදාලව ප්‍රගතිය දැක්වෙන වාර්තාවක් ලබන දෙසැම්බර් 10 වෙනිදා අධිකරණයට ඉදිරිපත් කිරීමට කටයුතු කරන ලෙසයි.
