ශ්‍රී ලංකාවේ ප්‍රමුඛ පෙළේ තරුණ මාධ්‍යවේදියකු, ඩිජිටල් මාධ්‍ය උපායමාර්ගිකයකු සහ සිවිල් සමාජ නායකයකු වන විමුක්ති දුෂාන්ත, ඉන්දියානු තාක්ෂණික හා ආර්ථික සහයෝගිතා (ITEC) ආදි විද්‍යාර්ථින්ගේ සංගමයේ ඉදිරි වාරය සඳහා සහකාර ලේකම්වරයා ලෙස ඡන්දයෙන් තේරී පත්ව තිබේ.
මාධ්‍ය ක්ෂේත්‍රය, ඩිජිටල් නියෝජනය, මහජන සන්නිවේදනය මෙන්ම ශ්‍රී ලංකාව සහ ඉන්දියාව අතර ද්විපාර්ශ්වික වෘත්තීය සබඳතා ශක්තිමත් කිරීම උදෙසා ඔහු දක්වන ලද පුළුල් දායකත්වය අගයමින් මෙම පත්වීම හිමිව ඇත.
ඔහු, පුවත්පත් කර්තෘ මණ්ඩල නායකත්වය, රජයේ සන්නිවේදනය සහ සිවිල් සමාජ ක්‍රියාකාරකම් සම්බන්ධයෙන් වසර දහයකට වැඩි බහුමාන අත්දැකීම් ප්‍රමාණයකට හිමිකම් කියයි. ඔහු ‘ඉන්ෆෝ ශ්‍රී ලංකා’ (Info Sri Lanka) හි නිර්මාතෘවරයා වන අතර ශ්‍රී ලංකා – ඉන්දීය මාධ්‍ය මිත්‍රත්ව සංගමයේ (SLIMFA) සහකාර ලේකම්වරයා ලෙසද කටයුතු කරයි.
ජනාධිපති ලේකම් කාර්යාලය යටතේ පැවති ජාතික ජනසභා ලේකම් කාර්යාලයේ සන්නිවේදන හා මහජන සම්බන්ධතා අධ්‍යක්ෂවරයා ලෙස සේවය කිරීම මෙන්ම ලේක්හවුස් ආයතනයේ (ANCL) ප්‍රධාන කර්තෘ මණ්ඩල තනතුරු දැරීමද ඔහුගේ විශිෂ්ට වෘත්තීය ජීවිතයට ඇතුළත් වේ. මීට අමතරව, අග්‍රාමාත්‍ය කාර්යාලය යටතේ වූ සංහිඳියා යාන්ත්‍රණයන් සම්බන්ධීකරණ ලේකම් කාර්යාලයේ (SCRM) තනතුරු සහ එක්සත් ජාතීන්ගේ සහාය ලත් ‘අහන්න’ සංහිඳියා ව්‍යාපෘතිය ඇතුළු මැතිවරණ නිරීක්ෂණ මුලපිරීම්, දූෂණ විරෝධී මණ්ඩල සහ කලාපීය සංහිඳියා රාමු සඳහාද ඔහු සිය උපායමාර්ගික දායකත්වය ලබා දී ඇත.
ඉන්දියාවේ තෙලන්ගානා හි Dr. Marri Channa Reddy Human Resource Development Institute (MCRHRDIAP) මාධ්‍ය කළමනාකරණය පිළිබඳ විශේෂඥ පුහුණුව ලබා ඇති ITEC ආදි විද්‍යාර්ථින්ගේ සංගමයේ හිටපු සිසුවකු වන විමුක්ති දුෂාන්ත, ITEC ආදි විද්‍යාර්ථින්ගේ සංගමයේ විධායක කමිටුවට මෙසේ තේරී පත්වීම කලාපය පුරා ශක්තිමත් වෘත්තීය, සංස්කෘතික සහ සහයෝගිතා ජාලයන් ගොඩනැගීමේ වැදගත් පියවරකි.
