ලබන වසරේ ජාතික වෙසක් උත්සවය කොළඹ නගරය කේන්ද්ර කරගෙන පැවැත්වීම සම්බන්ධයෙන් බුද්ධ ශාසන සභාවේ අවධානය යොමුවූ බව බුද්ධ ශාසන හා සංස්කෘතික කටයුතු අමාත්ය හිනිදුම සුනිල් සෙනෙවි පවසයි.
බුද්ධ ශාසන අමාත්යාංශයේ දී ඊයේ (09) රැස්වූ බුද්ධ ශාසන සභාව ආපදාවට ලක් වූ වෙහෙර විහාරස්ථාන පිළිසකර කිරීම, ජාතික වෙසක් උත්සවය සහ දහම් පාසල් අධ්යාපනය මුහුණ දෙන ගැටලු මෙන්ම ලබන වසරේ පැවැත්වීමට නියමිත ජාතික වෙසක් උත්සවය සම්බන්ධයෙන් අවධානය යොමු කර ඇත.
සමාජ සංරක්ෂණය හා සුපෝෂණ කමිටුව, භික්ෂු අධ්යාපනය හා ධර්ම පර්යේෂණ කමිටුව, අන්තර් ආගමික හා ජාතික සංහිඳියාව පිළිබඳ කමිටුව නමින් කමිටු තුනක් නම් කිරීමට මෙහි දී තීරණය කර ඇත.
බුද්ධ ශාසන සභා රැස්වීමෙන් අනතුරුව මාධ්ය හමුවේ අදහස් දැක්වූ අමාත්යවරයා සඳහන් කළේ, ස්වාභාවික ආපදා ව්යසනය හේතුවෙන් ආපදාවට ලක් වූ සියලු වෙහෙර විහාරස්ථාන පිළිසකර කිරීම රජය භාරගන්නා බවයි.
පූර්ණ වශයෙන් ආපදාවට ලක් වූ විහාරස්ථානවල සංඝාවාසය, ධර්ම ශාලාව සහ සනීපාරක්ෂක පහසුකම් පිළිසකර කරනු ලබන අතර දෙවන වටයකදී
පුරාවිද්යාත්මක වටිනාකමක් සහිත ස්ථාන සහ බුද්ධ මන්දිර ඇතුළු අනිකුත් සියලුම ස්ථාන පිළිසකර කිරීම සිදු කරනු ලබන බව ද අමාත්යවරයා මෙහි දී පවසා ඇත.
බුද්ධ ශාසනයට ඇතිවී තිබෙන නොයෙක් උවදුරු සහ නිකායන් ආරම්භ කරමින් විදේශ රටවලින් නොයෙක් ලාභ ප්රයෝජන ලබාගෙන ශාසනය විනාශ කිරීමේ භයානක තත්ත්වය සම්බන්ධයෙන් ද මෙවර බුද්ධ ශාසන සභාවේ දී වැඩි අවධානයක් යොමු කර ඇත.
