බගවත්තලාව පොලිස්වසමට අයත් කොටියාගල වතුයායේ ඉහළ කොටසේ තේ වත්තේ ගසක අටවා තිබූ කම්බි මන්දකට අසුවී මියගොස් සිටි කඳුකර කොටියෙකුගේ සිරුරක් අද (10) උදෑසන හමු වූ බව නල්ලතන්නි වනජිවි කාර්යාලයේ නිළධාරින් පවසයි.
තේ වත්තේ සැරි සරන මෙම කඳුකර කොටියා අල්ලා ගැනීමට කිසිවකු හෝ මන්දක් අටවා තිබූ බවට සැක කරන බව වනජිවි කාර්යාලයේ නිළධාරින් කියා සිටියි.
මෙම වතුයායේ වතු කම්කරුවන් නිවෙස්වල සුරතලයට ඇති කරන සුනඛයන් මෙන්ම, කිරි ගවයින් දඩයම් කිරීම මෙම කඳුකර කොටින් සිදුකරන බැවින් කිසියම් අයකු කොටියා අල්ලා ගැනීමට මෙලෙස මන්දක් අටවන්නට ඇතැයි එම නිළධාරීන් සැක පළ කරයි.
කම්බි මන්දට හසුවූ කොටියා ඉන් මිදි යෑමට ගත් උත්සහයේදී කොටියාගේ ගෙල ප්රදේශය කම්බියට සිර වී ජීවිතක්ෂයට පත් වී ඇත.
කදුකර කොටියා මන්දට හසු වි ඇති ස්ථානය පරික්ෂා කල බගවන්තලාව පොලිසියේ නිළධාරින් ඒ අසල තේ වත්තේ අටවා තිබූ තවත් කම්බි මදු ගණනාවක් සොයා ගෙන එම මදු ගලවා ඉවත් කර ඇත.
මියගිය කොටියාගේ සිරුර හැටන් මහේස්ත්රාත් අධිකරණයට ඉදිරිපත් කර සිරුර පෂ්චාත් මරණ පරික්ෂණය සදහා රන් දෙණිගල පශු වෛද්ය කාර්යාලය වෙත රැගෙන යන බවත්, තේ වත්තේ මන්ද ඇටවූ සැකකරුවන් අත්අඩංගුවට ගැනීමට බගවන්තලාව පොලිසියේද සහයෝගය ඇතිව කටයුතු කරන බවත් නල්ලතන්නි වනජිවි කාර්යාලයේ නිළධාරින් වැඩි දුරටත් සඳහන් කරයි.
