දූෂණ චෝදනාවක් සම්බන්ධයෙන් වරදකරු වීමෙන් අනතුරුව තමන්ට නියම කරනු ලැබූ බරපතළ වැඩසහිත වසර 16 ක සිරදඬුවම හා දඩ මුදල්වලින් තමන්ව නිදොස් කොට නිදහස් කරන ලෙස ඉල්ලා හිටපු නියෝජ්ය අමාත්ය සරණ ගුණවර්ධන මහතා විසින් අභියාචනාධිකරණයට ඇපැල් පෙත්සම් 4 ක් ඉදිරිපත් කර තිබේ.
නීතිඥ රන්ජන් ද සිල්වා මහතා මාර්ගයෙන් ගොනුකර ඇති මෙම අභියාචනා පෙත්සම් අභියාචනාධිකරණයට යොමු කිරීම සඳහා කොළඹ මහාධිකරණය වෙත භාරදී තිබේ.
2006 වසරේ සංවර්ධන ලොතරැයි මණ්ඩලයේ සභාපතිවරයා වශයෙන් කටයුතු කරමින් සිටියදී එම ආයතනයට කුලී පදනම මත වාහන ලබා ගැනීමේ නියමිත ප්රසම්පාදන ක්රියාවලිය අනුගමනය නොකර ලබා ගැනීම මඟින් රජයට පාඩු සිදුකළ බවට චෝදනා කරමින් හිටපු නියෝජ්ය අමාත්ය සරණ ගුණවර්ධන මහතාට විරුද්ධව අල්ලස් කොමිසම විසින් කොළඹ මහාධිකරණය හමුවේ නඩු 4 ක් ගොනුකර තිබුණි.
එම නඩු විභාග කිරීමෙන් අනතුරුව විත්තිකාර සරණ ගුණවර්ධන මහතා අදාළ චෝදනා වලට වරදකරු කෙරුණු අතර ඔහුට එක් නඩුවකට බරපතළ වැඩසහිත වසර 4 බැගින් සිරදඬුවම් නියම කෙරුණි. ඒ අනුව ඔහුට බරපතළ වැඩ සහිත වසර 16ක සිරදඬුවම් නියම කළ මහාධිකරණ විනිසුරුවරයා විත්තිකරුට රුපියල් ලක්ෂ 18ක දඩයක්ද නියම කරනු ලැබීය.
එම සිරදඬුවමෙන් සහ දඩ මුදල්වලින් තමන්ව නිදොස් කොට නිදහස් කරන ලෙස ඉල්ලා සරණ ගුණවර්ධන මහතා විසින් අභියාචනාධිකරණය වෙත මෙම ඇපැල් පෙත්සම් ඉදිරිපත් කර තිබේ.
