හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ හිටපු නාවික හමුදාපති වසන්ත කරන්නාගොඩට එරෙහිව දූෂණ චෝදනා සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව කොළඹ මහාධිකරණය හමුවේ අධිචෝදනා ගොනු කර තිබේ.
2006 සැප්තැම්බර් 1 සිට 2007 ජූනි 8 දක්වා කාලය තුළ ශ්රී ලංකා නාවික හමුදාපති ලෙස කටයුතු කළ වසන්ත කරන්නාගොඩ මහතා, යෝෂිත රාජපක්ෂට බ්රිතාන්ය රාජකීය නාවික හමුදාවේ Royal Navy Young Officers Course පුහුණු පාඨමාලාවට අයුතු ලෙස සහභාගි වීමට අවස්ථාව ලබාදීමෙන් රජයට පාඩුවක් සිදු කළ බවට චෝදනා එල්ල වී ඇත.
එමෙන්ම, එම ක්රියාව හරහා අයුතු ප්රතිලාභයක් ලබාගත් බවට යෝෂිත රාජපක්ෂ මහතාට ද චෝදනා ගොනු කර තිබේ.
අදාළ සිද්ධිය සම්බන්ධයෙන් විත්තිකරුවන් දෙදෙනාට එරෙහිව අල්ලස් කොමිසම විසින් අධිචෝදනා 08ක් ඉදිරිපත් කර ඇත.
මෙම අධිචෝදනා පත්ර කොළඹ මහාධිකරණයේ ගොනු කර ඇති අතර, ඒවා විත්තිකරුවන්ට භාරදීම සඳහා ඉදිරියේදී අධිකරණය විසින් සිතාසි නිකුත් කිරීමට නියමිත බව වාර්තා වේ.
