ශිෂ්යත්ව සහ අ.පො.ස. උසස් පෙළ විභාග පැවැත්වෙන කාලසීමාව තුළ ඇතිවිය හැකි ආපදා හදිසි තත්ත්වයන් සම්බන්ධයෙන් දැනුම්දීම සඳහා නව දුරකථන අංක පහක් හඳුන්වාදීමට කටයුතු කරන බව ආපදා කළමනාකරණ මධ්යස්ථානය (DMC) පවසයි.
එහි අධ්යක්ෂ ප්රදීප් කොඩිප්පිලි මහතා සඳහන් කළේ, ත්රිවිධ හමුදාව, ශ්රී ලංකා පොලීසිය සහ අනෙකුත් අදාළ ආයතන සමඟ එක්ව විභාග කාලය සඳහා විශේෂ සම්බන්ධීකරණ වැඩපිළිවෙළක් සකස් කර ඇති බවයි.
ඒ අනුව, විභාගයට පෙර දිනයේ සිට විභාගය අවසන් වන තෙක් එම වැඩසටහන ක්රියාත්මක වන අතර, ආපදා තත්ත්වයක් මතුවුවහොත් විභාග අපේක්ෂකයන් ආරක්ෂිතව විභාග මධ්යස්ථාන වෙත ප්රවාහනය කිරීම, ප්රශ්නපත්ර ප්රවාහනය සහ රාජකාරි නිලධාරීන්ගේ කටයුතු අඛණ්ඩව පවත්වාගෙන යාම සඳහා අවශ්ය සැලසුම් සකස් කර තිබේ.
විභාගයට පෙර දිනයේදී හඳුන්වාදෙන නව දුරකථන අංක පහ ඔස්සේ ජනතාවට ආපදා සම්බන්ධ තොරතුරු දැනුම්දිය හැකි අතර, ආපදා කළමනාකරණ මධ්යස්ථානයේ 117 හදිසි දුරකථන අංකයද අඛණ්ඩව ක්රියාත්මක වන බව අධ්යක්ෂවරයා පැවසීය.
එමෙන්ම පවතින කාලගුණ හා ආපදා තත්ත්වයන් පිළිබඳ යාවත්කාලීන තාක්ෂණික වාර්තා පැය තුනෙන් තුනට හෝ අවශ්ය අවස්ථාවලදී පැය හයෙන් හයට නිකුත් කිරීමට නියමිත අතර, විභාග කාලය පුරා ත්රිවිධ හමුදාව සහ පොලීසිය එක්ව අඛණ්ඩව සේවයේ නිරත වන බවද ප්රදීප් කොඩිප්පිලි මහතා සඳහන් කළේය.
