2026 අධ්යයන පොදු සහතික පත්ර උසස් පෙළ විභාගය අද (10) ආරම්භ වන අතර, එය සැප්තැම්බර් 05 වැනිදා දක්වා දිවයින පුරා පිහිටි විභාග මධ්යස්ථාන 2,532කදී පැවැත්වීමට නියමිතය.
මෙවර උසස් පෙළ විභාගය සඳහා අයදුම්කරුවන් 372,310 දෙනෙකු පෙනී සිටීමට නියමිත අතර, එම සංඛ්යාවට පාසල් අයදුම්කරුවන් 264,496 දෙනෙකු සහ පෞද්ගලික අයදුම්කරුවන් 107,814 දෙනෙකු ඇතුළත් වේ.
විභාගය ආරම්භ කිරීමට පැයකට පෙර අයදුම්කරුවන් විභාග මධ්යස්ථාන වෙත පැමිණ සිටිය යුතු බව විභාග කොමසාරිස් ජනරාල් ඉන්දිකා කුමාරි මහත්මිය දැනුම් දෙයි.
එමෙන්ම ජංගම දුරකථන, ස්මාර්ට් අත්ඔරලෝසු, සටහන්, බ්ලූටූත් උපාංග ඇතුළු කිසිදු ඉලෙක්ට්රොනික උපකරණයක් විභාග ශාලාවට රැගෙන ඒමට අවසර නොමැති බවද ඇය අවධාරණය කර තිබේ.
විභාග නීති රීති දැඩි ලෙස පිළිපදිමින් විභාග වංචාවලින් වැළකී සිටින ලෙසද අයදුම්කරුවන්ගෙන් ඉල්ලා සිටින විභාග කොමසාරිස් ජනරාල්වරිය, පසුගිය වසරවලදී විභාග වංචාවලට සම්බන්ධ වූ සිසුන් රැසකගේ ප්රතිඵල අත්හිටුවීමට සිදුවූ බවද සඳහන් කළාය.
මේ අතර, කිසියම් හදිසි ආපදා තත්ත්වයක් ඇති වුවහොත් ඒ සඳහා අවශ්ය පහසුකම් සැලසීමට විභාග දෙපාර්තමේන්තුව සූදානමින් සිටින බවද ඇය වැඩිදුරටත් ප්රකාශ කර තිබේ.
