2026 අධ්යයන පොදු සහතික පත්ර උසස් පෙළ විභාගයේ ප්රතිඵල මෙම වසර අවසන් වීමට පෙර නිකුත් කිරීමට අවශ්ය පියවර ගන්නා බව විභාග කොමසාරිස් ජනරාල් ඉන්දිකා කුමාරි මහත්මිය පවසයි.
අද (10) පෙරවරුවේ පැවැති මාධ්ය හමුවකට එක්වෙමින් ඇය සඳහන් කළේ, උසස් පෙළ විභාගයේ පිළිතුරු පත්ර ඇගයීමේ කටයුතු සැප්තැම්බර් 03 වැනිදා සිට ආරම්භ කිරීමට සැලසුම් කර ඇති බවයි.
2026 උසස් පෙළ විභාගය අද ආරම්භ වූ අතර, සැප්තැම්බර් 05 වැනිදා දක්වා දිවයින පුරා විභාග මධ්යස්ථාන 2,532කදී එය පැවැත්වීමට නියමිතය.
මෙවර විභාගය සඳහා පාසල් අයදුම්කරුවන් 264,496 දෙනෙකු සහ පෞද්ගලික අයදුම්කරුවන් 107,814 දෙනෙකු ඇතුළුව අයදුම්කරුවන් 372,310 දෙනෙකු පෙනී සිටින බව විභාග දෙපාර්තමේන්තුව සඳහන් කරයි.
දිවයින පුරා විභාග කටයුතු අද පෙරවරු 8.30ට සැලසුම් කළ පරිදි ආරම්භ වූ බවත්, මේ දක්වා කිසිදු ගැටලුකාරී තත්ත්වයක් වාර්තා වී නොමැති බවත් විභාග කොමසාරිස් ජනරාල්වරිය ප්රකාශ කළාය.
සංශෝධනය කර ඇති විභාග කාලසටහන පිළිබඳව නිසි අවබෝධයකින් කටයුතු කරන ලෙසත්, කාලසටහනේ සඳහන් දින හා වේලාවන්ට අනුව විභාග මධ්යස්ථාන වෙත පැමිණෙන ලෙසත් ඇය අපේක්ෂකයන්ගෙන් ඉල්ලා සිටියාය.
එමෙන්ම ජංගම දුරකථන, ස්මාර්ට් අත් ඔරලෝසු, විද්යුත් උපකරණ, සටහන් ඇතුළු තහනම් ද්රව්ය විභාග ශාලාවට රැගෙන ඒමෙන් වළකින ලෙසද විභාග කොමසාරිස් ජනරාල්වරිය දැනුම් දුන්නාය.
විභාග ශාලාව තුළ කතාබහ කිරීම, පිළිතුරු පත්ර හුවමාරු කර ගැනීම හෝ විභාග කටයුතුවලට බාධා වන ආකාරයෙන් හැසිරීම වැනි අක්රමිකතාවලට සම්බන්ධ වන අපේක්ෂකයන්ට ප්රතිඵල අත්හිටුවීම ඇතුළු දැඩි දඬුවම් පැනවිය හැකි බවද ඇය අවධාරණය කළාය.
විභාග කාර්ය මණ්ඩලය සම්බන්ධයෙන්ද දැඩි නීති ක්රියාත්මක වන අතර, ජංගම දුරකථන භාවිත කිරීමට අවසර හිමිවන්නේ විභාග ශාලාධිපතිවරුන්ට සහ අතිරේක සහකාර ශාලාධිපතිවරුන්ට පමණක් බව විභාග කොමසාරිස් ජනරාල්වරිය සඳහන් කළාය.
විභාග අක්රමිකතාවකට සම්බන්ධ වන ඕනෑම කාර්ය මණ්ඩල සාමාජිකයෙකුට විභාග පනතට අනුව දඬුවම් ලබාදීමට කටයුතු කරන බවද ඇය වැඩිදුරටත් පැවසුවාය.
මේ අතර, මේ වන විට දිවයිනේ කිසිදු ප්රදේශයකින් ආපදා තත්ත්වයක් වාර්තා වී නොමැති බවත්, හදිසි තත්ත්වයක් ඇති වුවහොත් ඊට මුහුණ දීම සඳහා අදාළ සියලු ආයතන සූදානමින් සිටින බවත් විභාග කොමසාරිස් ජනරාල් ඉන්දිකා කුමාරි මහත්මිය වැඩිදුරටත් සඳහන් කළාය.
