අටපිරිකර සහ පිරිකර අලෙවිය සම්බන්ධයෙන් මේ වනවිට දිවයින පුරා විශේෂ වැටලීම් 119ක් සිදුකර ඇති බව පාරිභෝගික කටයුතු පිළිබඳ අධිකාරිය සඳහන් කරයි.
පාරිභෝගිකයින්ගේ අයිතිවාසිකම් ආරක්ෂා කිරීම මෙන්ම අටපිරිකර හා පිරිකර අලෙවියේදී නීතිමය අවශ්යතා නිසි පරිදි සපුරා තිබේද යන්න පරීක්ෂා කිරීම මෙම වැටලීම්වල අරමුණ වී තිබේ.
එහිදී අදාළ භාණ්ඩවල හෝ ඒවායේ ඇසුරුම්වල අවශ්ය තොරතුරු සඳහන් කර තිබේද සහ නීතිමය අවශ්යතා අනුගමනය කරන්නේද යන්න පරීක්ෂා කර ඇත.
එමෙන්ම වෙළෙඳුන් විසින් පවත්වාගෙන යා යුතු බිල්පත්, ඉන්වොයිස් ඇතුළු අනෙකුත් අදාළ ලේඛන සම්බන්ධයෙන්ද නිලධාරීන්ගේ අවධානය යොමුව තිබේ.
මෙම වැටලීම්වලදී නීති උල්ලංඝනයට අදාළ අටපිරිකර, සිවුරු, අදනකඩ, බඳපටි, පාත්ර සහ අනෙකුත් පිරිකර ඒකක 436ක් නිලධාරීන් භාරයට ගෙන ඇති බවද සඳහන් වේ.
අටපිරිකරවල පිටත ඇසුරුම පමණක් පරීක්ෂා නොකර, අහඹු ලෙස තෝරාගත් අටපිරිකර විවෘත කර ඒවා තුළ අඩංගු භාණ්ඩද පරීක්ෂා කිරීමට විමර්ශන නිලධාරීන් කටයුතු කර තිබේ.
එහිදී දෙපට සිවුර වෙනුවට තනිපට සිවුරක් ඇතුළත් කර තිබීම, අටපිරිකරට අයත් භාණ්ඩ අට සම්පූර්ණව නොතිබීම, සඳහන් කර ඇති මිල අනුව භාණ්ඩ වෙනස් වීම වැනි අක්රමිකතා අනාවරණය වී ඇත.
මීට අමතරව ඇලුමිනියම්වලින් නිෂ්පාදනය කළ පාත්ර, තැලී ගිය පාත්ර සහ මළ බැඳුණු දැලි පිහි වැනි භාණ්ඩද ඇතැම් අටපිරිකර තුළ ඇතුළත් කර තිබූ බව පාරිභෝගික කටයුතු පිළිබඳ අධිකාරිය සඳහන් කරයි.
