මෙරට මුහුදු සීමාවට අනිසි ලෙස ඇතුළු වී නීතිවිරෝධී ධීවර කටයුතුවල නිරත වූ ඉන්දීය ධීවරයින් නවදෙනෙකු සහ ඔවුන් පැමිණි ධීවර යාත්රාවක් ශ්රී ලංකා නාවික හමුදාව විසින් භාරයට ගෙන තිබේ.
ඊයේ (12) රාත්රී කාලයේදී තලෙයිමන්නාරම, උරුමලෙයි තුඩුවට ඔබ්බෙන් වූ මෙරට සුවිශේෂී මුහුදු කලාපයේ නාවික හමුදාව සිදුකළ විශේෂ මෙහෙයුමකදී මෙම යාත්රාව අත්අඩංගුවට ගෙන ඇත.
අදාළ ඉන්දීය ධීවර යාත්රාව ජාත්යන්තර මුහුදු සීමාව (IMBL) උල්ලංඝනය කරමින් මෙරට මුහුදු තීරයට ඇතුළු වී ඇති අතර, මුහුදු පතුලට දැඩි ලෙස හානි පමුණුවන ‘Bottom Trawling’ (පතුල සූරා මසුන් ඇල්ලීමේ) නීතිවිරෝධී ක්රමවේදය භාවිත කරමින් මසුන් අල්ලමින් සිටියදී මෙලෙස හසු වී තිබේ.
නාවික හමුදා භාරයට ගත් ධීවරයින් නවදෙනා සහ ධීවර යාත්රාව ඉදිරි නීතිමය කටයුතු සඳහා මන්නාරම ධීවර පරීක්ෂකවරයා වෙත භාරදීමට නියමිතය.
මන්නාරම් දූපත සහ ආදම්ගේ පාලම ආශ්රිත මන්නාරම් බොක්ක කලාපය, ජාත්යන්තර මෙන්ම දේශීය වශයෙන්ද ඉහළ වටිනාකමකින් යුතු සංවේදී මුහුදු ජෛව විවිධත්ව සංරක්ෂිත කලාපයක් වන අතර, විශේෂ ධීවර කළමනාකරණ සහ පාරිසරික ආරක්ෂණ රෙගුලාසි යටතේ පවතින මෙම ප්රදේශයට මෙවැනි නීතිවිරෝධී ධීවර කටයුතු මඟින් දැඩි පාරිසරික තර්ජනයක් එල්ල වේ.
