ත්රස්තවාදය වැළැක්වීමේ පනත යටතේ අත්අඩංගුවට ගෙන දින අනූවක රැඳවුම් භාරයේ සිටින, අන්තර් විශ්වවිද්යාල ශිෂ්ය බල මණ්ඩලයේ කැඳවුම්කරු වසන්ත මුදලිගේගේ මූලික අයිතිවාසිකම් පෙත්සම විභාගයට ගත් අවස්ථාවේ දී, එම නඩුවේ වගඋත්තරකාරයෙකු ලෙස බස්නාහිර පළාත් ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් නම් කිරීමට ශ්රේෂ්ඨාධිකරණය ඊයේ (10) අවසර ලබා දුන්නා.
ඒ, නිසි සාක්ෂි නොමැතිව වසන්ත මුදලිගේව අත්අඩංගුවට ගැනීම ඔහුගේ මූලික අයිතිවාසිකම් කඩ කිරීමක් බැවින් පෙත්සමේ හත්වැනි වගඋත්තරකරු ලෙස ජ්යෙෂ්ඨ නියෝජ්ය පොලිස්පතිවරයා නම් කිරීමට වසන්ත මුදලිගේ වෙනුවෙන් පෙනී සිටි ජනාධිපති නීතිඥ සාලිය පීරිස් අධිකරණයෙන් ඉල්ලා සිටි අවසරයට අනුමැතියක් වශයෙන්.
ත්රස්තවාදී ක්රියා සිදු කළා යැයි පවසමින් ත්රස්තවාදී පනත යටතේ වසන්ත මුදලිගේව තවදුරටත් රඳවා ගැනීමට ඉල්ලමින් ජ්යෙෂ්ඨ නියෝජ්ය පොලිස්පතිවරයා, ආරක්ෂක අමාත්යංශයේ ලේකම්වරයාට ලිපියක් යොමු කර ඇති අතර එය පොලිස්පතිවරයා හරහා නොගොස් නියමිත ක්රියා පටිපාටිය උල්ලංඝණය කරමින් සිදු කර ඇති බව ද ඊයේ අධිකරණයේ දී හෙළිදරව් වී තිබුණා.
මෙහිදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල් මාධව තෙන්නකෝන් කරුණු දක්වමින් සඳහන් කළේ, ප්රායෝගික දුෂ්කරතා හා හදිසි අවශ්යතා සැලකිල්ලට ගනිමින් පොලීසිය රැඳවුම් නියෝග ලබා ගැනීම සාමාන්ය තත්ත්වයක් බවයි.
