ගජමුතු තොගයක් සහ රිදී මංජුසාවක් ජාවාරම් කිරීම සඳහා සන්තකයේ තබාගෙන සිටි පුද්ගලයෙකු මඩකලපුව ප්‍රදේශයේදී විශේෂ කාර්ය බළකාය විසින් අත්අඩංගුවට ගෙන තිබෙනවා.
විශේෂ කාර්ය බළකාය කල්මුණ කඳවුරේ නිලධාරීන්ට ලද තොරතුරකට අනුව ඊයේ (29) මඩකලපුව පොලිස් වසමේ – පුලියන්තිව් ගාන්ධි ළමා උද්‍යානය ඉදිරිපිට දී වැටලීමක් සිදුකර තිබුණා.
එම අවස්ථාවේදීයි ගජමුතු 11ක් සමඟ රිදී මංජුසාවක් සන්තකයේ තබාගෙන සිටි අවුරුදු 30ක් වන වෙන්කලඩි ප්‍රදේශයේ පදිංචි අදාළ පුද්ගලයාව අත්අඩංගුවට ගෙන ඇත්තේ.
එම ගජමුතු තොගය සහ රිදී මංජුසාව රුපියල් කෝටි දෙකහමාරකට අධික වටිනාකමකින් යුක්ත වන බවයි වාර්තා වන්නේ.
එහිදී විශේෂ කාර්ය බලකා භාරයට ගත් ගජ මුතු සහ රිදී මංජුසාව සමග සැකකරු මඩකලපුව පොලිස් ස්ථානය වෙත භාර දී තිබෙනවා.
සිද්ධිය සම්බන්ධයෙන් වැඩිදුර විමර්ශන ක්‍රියාත්මකයි.
