ආපදා කළමණාකරණ මධ්‍යස්ථානය විසින් ඉකුත් වසර දහතුනක කාලය තුළදි (2011 වසරේ සිට 2023) ආපදා අවම කිරිමේ ව්‍යාපෘති සදහා රුපියල් තුන් සිය විසි හතර කෝටි, හැත්තෑ හත් ලක්ෂ, හැට එක් දහස්,පන්සිය පනස් නමයක (3,247,761,559) වියදමක් දරා ඇතත් එම ව්‍යාපෘතිවලින් ලබාගෙන ඇත්තේ ඉතා අල්ප ප්‍රතිඵලයක් බැව් ජාතික විගණන කාර්යාලය මගින් නිකුත්කොට ඇති විගණන වාර්තාවක සඳහන් වනවා.
ගංවතුර, නායයෑම්, දැඩි සුළං තත්ත්ව හේතුවෙන් 2022 සහ 2023 වසර දෙක තුළ පුද්ගලයින් දෙලක්ෂ, තිස්පන්දහස් ,තුන්සියවිසිනම දෙනෙකු (235,389) පීඩාවට ලක්වුහ. මෙවර ගං වතුර තත්ත්වය හේතුවෙන් ආපාදාවට පත් වූ පුද්ගලයින් ගණන හාර ලක්ෂ හැත්තෑ පන් දහස ඉක්මවීය.
ආපදා අවම කිරිමේ ව්‍යාපෘති වලින් අපේක්ෂිත ප්‍රථිපල ලඟා කරගත යුතු බැව් විගණනය මගින් නිර්දේශ කොට ඇත.
මේ පිළිබද ආපදා කළමණාකරණ මධ්‍යස්ථානයේ කළමණාකාරිත්වය විසින් විගණනයට සඳහන් කොට ඇත්තේ ඉකුත් වසර 13 තුළ ලැබි ඇති ආපදා අවම කිරිමේ ප්‍රතිපාදනවලින් පමණක් ආපදාවන්ගෙන් පිඩාවට පත්වන පුද්ගලයින් සංඛ්‍යාව අඩුකළ නොහැකි බවය.
මේ සදහා බලපානු ලබන සමාජ, ආර්ථික, හා පුද්ගල බද්ධ කරුණු බොහෝමයක් හේතුවි ඇති බවද කළමණාකාරිත්වය විසින් විගණනයට සඳහන් කොට ඇත.
