2025 වසරේ මේ දක්වා වනාන්තර ආශ්‍රිතව ගිනි ගැනීමේ සිදුවීම් 09 ක් වාර්තා වී ඇති බව වන සංරක්ෂණ දෙපාර්තමේන්තුව පවසයි.
ඒ අනුව, මහනුවර දිස්ත්‍රික්කයේ ගිනිගැනීම් 04 ක්, රත්නපුර දිස්ත්‍රික්කයේ ගිනිගැනීම් 02 ක්, මාතලේ, බදුල්ල සහ නුවරඑළිය දිස්ත්‍රික්කවල ගිනි ගැනීම් එක බැගින් වාර්තා වී ඇති බවයි ඔවුන් පවසන්නේ.
එමෙන්ම බදුල්ල, මහනුවර, නුවරඑළිය, මාතලේ, රත්නපුර, මොණරාගල සහ කෑගල්ල දිස්ත්‍රික්කවල බහුලව ගිනි ගැනීම් සිදුවන දිස්ත්‍රික්ක ලෙස හදුනාගෙන ඇති බවත්, සෑම වසරකම වියළි කාලයේ වනාන්තර ආශ්‍රිතව පවතින තෘණ භූමි, වන වගා සහ වෙනත් වනාන්තරවල ගිනි ඇති වීමේ වැඩි ප්‍රවණතාවක් දක්නට ලැබෙන බවත් වන සංරක්ෂණ දෙපාර්තමේන්තුව සදහන් කරයි.
කෙසේ නමුත් 2024 වසරේ හෙක්ටයාර 437 ක ප්‍රමාණයක් මෙලෙස ගිනි ගැනීමට ලක්ව තිබේ.
මෙම ගිනි ගැනීම් සිදුවීම් සියල්ලම මිනිසුන් විසින් ඇති කරන ලද ගිනි තැබීම් බවට අනාවරණ වී ඇති බැවින් වනාන්තර අසල ගිනි තැබීමෙන් වළකින ලෙස වන සංරක්ෂණ දෙපාර්තමේන්තුව ජනතාවට දැනුම් දෙයි.
