මහ බැංකු බැඳුම්කර සිද්ධිය සම්බන්ධයෙන් හිටපු මහ බැංකු අධිපති අර්ජුන මහේන්ද්‍රන් ඇතුළු සැකකරුවන් නව දෙනෙකුට එරෙහිව පැවැත්වෙන විමර්ශන කටයුතුවලට අදාළ මහ බැංකු වාර්තා කැඳවන ලෙස කොළඹ ප්‍රධාන මහේස්ත්‍රාත් තනූජා ලක්මාලි අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසයට නියෝග කල බව වාර්තා වේ.
මහ බැංකු භාණ්ඩාගාර බැඳුම්කර මිලදී ගෙන රජයට පාඩු සිදුකළ බව කියන සිද්ධිය සම්බන්ධයෙන් සිදුකරන විමර්ශන සඳහා පර්පචුවල් ට්‍රරෙෂරීස් සමාගම මහ බැංකුවේ පවත්වාගෙන යනු ලබන ගිණුම් පිළිබඳ වාර්තාවක් ගැනීමට අවශ්‍යව ඇති බැවින් ඊට අදාළ නියෝගයක් ලබා දෙන ලෙසට අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන කොට්ඨාසය කළ ඉල්ලීමක් සලකා බැලීමෙන් පසුව අධිකරණයෙන් එසේ නියම කර ඇත.
2015 පෙබරවාරි 27 වන දා මහ බැංකු බැඳුම්කර නිකුතුවේදී රජයට රුපියල් මිලියන 688කට අධික පාඩුවක් කිරීමට එරෙහිව සිදුකරන විමර්ශනවලට අදාළව මෝසමක් ඉදිරිපත් කරමින් එම විමර්ශන ඒකකය අධිකරණයෙන් එම ඉල්ලීම ඉදිරිපත් කර කළේ ය.
මහබැංකු බැඳුම්කර සිද්ධිය සම්බන්ධයෙන් හිටපු මහ බැංකු අධිපති අර්ජුන මහේන්ද්‍රන් ඇතුළු සැකකරුවන් 09 දෙනකුට එරෙහිව මෙම විමර්ශනය කරන බවත් ප්‍රපර්චුවල් සමාගම එම විමර්ශනයේ තුන්වන සැකකරු ලෙස නම් කර තිබෙන බව ද විමර්ශන නිලධාරීන් අධිකරණයට දැන්වීය.
මූල්‍ය අපරාධ විමර්ශන කොට්ඨාසයේ නිලධාරීන් කරුණු ඉදිරිපත් කරමින් කියා සිටියේ සිද්ධිය සම්බන්ධයෙන් විමර්ශනය කිරීමට සැකකාර සමාගම ශ්‍රී ලංකා මහ බැංකුවේ පවත්වාගෙන යන ගිණුම සම්බන්ධයෙන් විස්තර වාර්තා අවශ්‍ය වී ඇති බවයි.
ඉදිරිපත් කළ කරුණු සලකා බැලූ ප්‍රධාන මහේස්ත්‍රාත්වරිය මෙම නියෝගය නිකුත් කරමින් විමර්ශන ප්‍රගතිය කඩිනමින් අධිකරණයට ඉදිරිපත් කරන ලෙස විමර්ශන නිලධාරීන්ට වැඩිදුරටත් නියෝග කර ඇත.
